Զելենսկին հայտարարել է Ադրբեջանից գազի տարանցման՝ Ուկրաինայի պատրաստակամության մասին. Politico
Ուկրաինան պատրաստ է գազը տարանցել Ադրբեջանից Եվրոպա, շաբաթ օրը հայտարարել է Ուկրաինայի նախագահ Վլադիմիր Զելենսկին, գրում է Politico-ն։
Զելենսկին Կիևում լրագրողներին ասել է, որ վերջին օրերին Ադրբեջանի նախագահ Իլհամ Ալիևի հետ հանդիպման ժամանակ քննարկել է համաձայնագիրը։
«Ադրբեջանն արտահանման մեծ ներուժ ունի։ Արտահանման ներուժը կազմում է 25 միլիարդ խորանարդ մետր, ասել է Զելենսկին։ -Մենք կարող ենք օգտագործել մեր ենթակառուցվածքները, եթե եվրոպական երկրները գազի կարիք ունեն։ Բայց ոչ ռուսական գազի»։
Զելենսկին այս մեկնաբանություններն արել է Մոլդովայի նախագահ Մայա Սանդուի հետ մամուլի ասուլիսի ժամանակ։
Շաբաթ օրը կայացած բանակցությունների ընթացքում կողմերը պայմանավորվել են «հրատապ և կոնկրետ լուծումներ գտնել» էներգետիկ ճգնաժամի համար Ռուսաստանի կողմից աջակցվող Մերձդնեստրում այն բանից հետո, երբ Մոսկվան դադարեցրեց գազի մատակարարումը Ուկրաինայի տարածքով և մինչ այժմ հրաժարվում է այլընտրանքային ուղիներից:
«Մենք ռուսներին թույլ չենք տա շահույթ ստանալ։ Բայց թույլ կտա՞նք ադրբեջանցիներին փող աշխատել։ Հաճույքով։ Կօգնե՞նք սլովակներին։ Հաճույքով։ Սա մի բան է, որ մենք կարող ենք արագ անել: Մենք կարող ենք պայմանագիր ստորագրել և արագ սկսել դրա իրագործումը, երբ ազդանշաններ լսենք (Մերձդնեստրի մայրաքաղաք) Տիրասպոլի, Սլովակիայի և եվրոպական այլ երկրների բնակիչներից»,- ասել է Ուկրաինայի նախագահը։
Սակայն փորձագետները կասկածում էին, որ Ադրբեջանն ի վիճակի է Ուկրաինայի տարածքով նոր զգալի ծավալներ մատակարարել Եվրոպա։ «Ադրբեջանը փորձում է դիրքավորվել որպես ԵՄ հիմնական էներգետիկ գործընկեր», – ասում է ICIS վերլուծական ընկերության գազի շուկաների փորձագետ Աուրա Սաբադուսը,- «Բայց նրանք չունեն բավարար արտադրություն, և այս պահին նրանք անում են լավագույնը, ինչ կարող են»:
Բաքվի հետ ցանկացած նման գործարք, հավանաբար, կներառի մատակարարման ծավալների փոխանակում, իսկ ռուսական մատակարարումները կվերանվանվեն որպես ադրբեջանական, ասել է Սաբադուսը:
