Գերմանիան և այլ երկրներ անմիջական կապ կհաստատեն Սիրիայում գործող «Հայաթ Թահրիր ալ-Շամ» խմբավորման հետ
Գերմանիան և արևմտյան այլ երկրներ անմիջական կապ կսկսեն Սիրիայում գործող «Հայաթ Թահրիր ալ-Շամ» խմբավորման հետ։ Այդ մասին հայտարարել է Գերմանիայի պաշտպանության նախարար Բորիս Պիստորիուսը։
«Մենք բոլորս կսկսենք որքան հնարավոր է շուտ միասին խոսել «Հայաթ Թահրիր ալ-Շամ» խմբավորման քաղաքական թևի հետ՝ նպաստելով տարածաշրջանի, Սիրիայի և նրա քրդական հատվածի վերահսկողության տակ անցած տարածքներում կայունության հաստատմանը», – ասել է Պիստորիուսն Իրաքում տեղակայված Բունդեսվերի զինվորներին այցելելու ժամանակ։
Ըստ նրա՝ նպատակը պետք է լինի բազմաթիվ փոքրամասնությունների պաշտպանությունը, ինչպես նաև հասարակության յուրաքանչյուր անդամի մասնակցության ապահովումը երկրում նոր կառավարության և կարգուկանոնի կառուցման գործում։
Ավելի վաղ Գերմանիայի արտգործնախարարության խոսնակ Սեբաստիան Ֆիշերը հայտարարել էր, որ Սիրիայում «Հայաթ Թահրիր ալ-Շամ» խմբավորման գործունեության գնահատականը կախված կլինի կրոնական և էթնիկ փոքրամասնությունների նկատմամբ նրա վերաբերմունքից։ Նա պարզաբանել էր, որ մինչև Գերմանիայի դեսպանատան հնարավոր բացումը, Սիրիայի ապագա կառավարության հետ դիվանագիտական հարաբերությունները ենթադրաբար կվարվեն Բեյրութի միջոցով։
Ավելի ուշ Գերմանիայի արտաքին գործերի նախարար Անալենա Բերբոքը հայտարարեց, որ Գերմանիայի ԱԳՆ-ն կավելացնի իր ներկայությունը Սիրիայում, և այդ նպատակով հատուկ ներկայացուցիչ է նշանակվել։
