Կառավարությունը նախատեսում է մասնակի փոխհատուցել արտահանման տրանսպորտային ծախսերը
Կառավարությունը նպատակ ունի աջակցել առևտրային օդային և ավտոմոբիլային փոխադրումների միջոցով արտահանում իրականացնողներին՝ տրամադրելով տրանսպորտային ծախսերի մասնակի փոխհատուցում:
«e-draft» իրավական ակտերի հրապարակման հարթակում ներկայացվել է մի նախագիծ, որով գործադիրը մտադիր է խթանել ոչ հանքահումքային արտադրանքի արտահանումը, նպաստել նոր շուկաների նվաճմանը և մեղմել հայկական ապրանքների գնագոյացման վրա տրանսպորտային ծախսերի ազդեցությունը:
2023 թվականին Հայաստանի արտահանման ծավալը կազմել է 8.4 մլրդ դոլար՝ արձանագրելով 55.3 տոկոս աճ նախորդ տարվա համեմատ: Արտահանման հիմնական ուղղություններն են Ռուսաստանը, ԱՄԷ-ն, Չինաստանը, ԵՄ երկրները, ԱՄՆ-ն և Վրաստանը: Չնայած այս աճին՝ Հայաստանը բախվում է առևտրային չիրացված ներուժի խնդիրների, որոնցից գլխավորն են տրանսպորտային ծախսերը և նոր շուկաներ մուտք գործելու խոչընդոտները:
