Ռուսաստանը, Չինաստանը և Իրանը մտադիր են տարաձայնություններ առաջացնել ԱՄՆ ընտրությունների շեմին. ԱՄՆ հետախուզություն
Ռուսաստանը, Չինաստանը և Իրանը մտադիր են «ամերիկացիների միջև տարաձայնություններ հրահրել նոյեմբերի 5-ին անցկավելիք ԱՄՆ ընտրություններից առաջ և ընտրողների՝ ընտրատեղամասեր ֆնալուց հետո կարող են դիտարկել բռնություն հրահրելու հարցը, երեքշաբթի հայտարարել են ԱՄՆ հետախուզության պաշտոնյաները, հաղորդում է Reuters-ը։
ԱՄՆ ընտրությունների անվտանգության թեմայով ճեպազրույց անցկացրած պաշտոնյաները հայտարարել են, որ օտարերկրյա դերակատարները կարող են դիտարկել ֆիզիկական սպառնալիքներն ու բռնությունները և, ամենայն հավանականությամբ, ապատեղեկատվական գործողություններ են իրականացնում՝ անորոշություն ստեղծելու և ընտրական գործընթացը խաթարելու համար:
«Օտարերկրյա դերակատարները, մասնավորապես Ռուսաստանը, Իրանը և Չինաստանը, շարունակում են տարաձայնություններ հրահրել՝ ամերիկացիների մեջ պառակտում մտցնելու և ԱՄՆ-ի դեմոկրատական համակարգի հանդեպ ամերիկացիների վստահությունը խաթարելու համար: Այս գործողությունները համահունչ են նրան, ինչն այս դերակատարների կարծիքով բխում է իրենց լավագույն շահերից, նույնիսկ եթե նրանց մարտավարությունը շարունակում է զարգանալ»,-նշել է Ազգային հետախուզության տնօրենի գրասենյակի (ODNI) պաշտոնյան:
Ըստ աղբյուրի՝ «ազդեցիկ անձինք, հատկապես Ռուսաստանից, Իրանից և Չինաստանից», դասեր են քաղել ԱՄՆ նախորդ ընտրություններից և ավելի լավ են պատրաստվել՝ անկարգություններ հրահրելու հնարավորություններն օգտագործելու համար:
Ըստ ԱՄՆ հետախուզության պաշտոնյայի, այդ դերակատարները կարող են օգտագործել նույն գործիքները, որոնք օգտագործել են ընտրությունների ժամանակ, հատկապես տեղեկատվական և կիբեր գործողությունները, միաժամանակ չի բացառվում ֆիզիկական սպառնալիքներն ու բռնության կիրառումը:
Սակայն պաշտոնյաներն ավելի վաղ հայտարարել էին, որ ԱՄՆ հետախուզությունը Ռուսաստանի, Չինաստանի և Իրանի միջև՝ ընտրությունների վրա ազդելու համար համագործակցություն չի տեսնում: Եվ չնայած օտարերկրյա դերակատարները կարող են ընտրությունների օրը փորձել խափանել գործընթացը՝ դժգոհություն բորբոքելով, քվեարկության համակարգը բավականաչափ ապահով է՝ արդյունքների վրա ազդելու համար, հավելել է հետախուզության պաշտոնյան:
