Միգրանտների մի մասը ՀՀ-ից հեռացել է, ծառայությունների ոլորտում գնաճի տեմպերի դանդաղում է նկատվում․ ԿԲ նախագահ

2024 թ. հուլիսի 30-ի նիստում ԿԲ խորհուրդը որոշեց իջեցնել վերաֆինանսավորման տոկոսադրույքը՝ սահմանելով այն 7,75 տոկոս․ ԿԲ խորհուրդը կարծում է, որ ավելի ցածր վերաֆինանսավորման տոկոսադրույքն անհրաժեշտություն է միջնաժամկետ գնաճի 4 % մակարդակի և գների կայունության նպատակի իրագործման համար։

Այսօրվա հերթական ասուլիսի ընթացքում ԿԲ նախագահ Մարտին Գալստյանն անդրադարձավ ոչ միայն ԿԲ խորհրդի որոշմանը:

Հարց հնչեց՝ եթե ԿԲ-ն նշում է, որ արտաքին պահանջարկը հետզհետե նվազում է, և ներգնա զբոսաշրջիկների կողմից ծախսերը երկրում նվազում են, ապա ինչո՞վ է բացատրվում այն, որ թեև նման գնահատական ունեք արտաքին պահանջների մասով,  ծառայությունները, որոնք սնվում են արտաքին պահանջարկից, դրանց գնաճը 3 տոկոսից չի իջնում։

Մարտին Գալստյանը պատասխանեց․ «Մեր դիտարկումներով՝ այդ միտումը կոտրվել է,  որոշակի նվազման միտում կա։ Այո, դա պայմանավորված է հիմնականում արտաքին պահանջարկի էական թուլացմամբ, ինչը մի քանի գործոն ունի․ մեկն  այն է, որ ներգնա տուրիզմի թվերն ավելի ցածր են, քան նախորդ տարվա ընթացքում։ Վիճակագրության կոմիտեն վերջերս հրապարակել է ցուցանիշներ, որոնց համաձայն՝ մեկ տուրիստի հաշվով իրականացվող ծախսերի թիվն է նվազ։ Երկրորդ գործոնն այն է, որ մենք ունեինք դրսից ՀՀ եկած աշխատանքային միգրանտներ կամ միջազգային այցելուներ, որոնց մի մասը, մեր ունեցած վիճակագրության համաձայն՝ ՀՀ-ից արդեն հեռանում կամ հեռացել է։ Դա վերաբերում է ոչ միայն բարձր որակավորում ունեցող մարդկանց, այլև ցածր որակավորում ունեցողներին։

Անցյալ տարվա սկզբից  Հնդկաստանից եկած քաղաքացիների 25 տոկոսի չափն արդեն ՀՀ-ում չեն՝ պաշտոնական վիճակագրության համաձայն, ինչը ևս վկայում է արտաքին պահանջարկի թուլացման վերաբերյալ։

Պիկի ժամանակ ունեինք 17 հազար հոգի։ Մեր վերջին դիտարկումներով՝ այս պահին Հայաստանում գտնվողները 11 հազար հոգի են»։