«Օլիմպիականները. Փարիզ-2024». ռինգում պետք է «գրագետ» լինել ու գործել. Դավիթ Չալոյան
![](https://168.am/wp-content/uploads/2024/07/MixCollage-15-Jul-2024-10-06-AM-8164.jpg)
Դավիթ Չալոյան
Բռնցքամարտիկ (+92 կգ)
26 տարեկան
աշխարհի առաջնության արծաթե մեդալակիր
Փարիզ-2024-ն առաջին Օլիմպիական խաղերն են
Մրցումային օրը` հուլիսի 29-ից
-Պատմեք խնդրեմ, թե ե՞րբ եք սկսել հետաքրքրվել բռնցքամարտով:
-Բռնցքամարտով սկսել եմ մարզվել 15 տարեկանից:Ու մինչ այդ ոչ մի մարզաձևով չեմ զբաղվել: Ամեն ինչ շատ պատահական ստացվեց: Ծնողներս էին որոշել, որ սպորտով զբաղվեմ, սակայն թե ինչ մարզաձև ընտրել, չէինք կողմնորոշվել: Առաջին անգամ բռնցքամարտի դահլիճ մտնելով՝ հասկացա, որ այն իմ մարզաձևն է:
-Զրոյից մարզաձևով զբաղվելու համար 15 տարեկանը մեծ տարիք է: Ինչպե՞ս ստացվեց, որ կարողացաք մնալ մարզաձևում:
-Այո, բավականին մեծ տարիք է սպորտով զբաղվելու համար, հատկապես, որ հետո ձգտելու ես բարձր արդյունքների: Սակայն ինձ մոտ կարծես ստացվեց:
-Իսկ ի՞նչն եք սիրում բռնցքամարտում:
-Կարծում եմ այն, որ մեջը պայքար կա, մենապայքար է: Բայց ոչ մարդկանց «ծեծելը» (հեղ. ծիծաղում է):
-Եղե՞լ է մի մրցաշար, որն, ըստ Ձեզ, բեկումնային է եղել և որից հետո վերջնականապես համոզվել եք, որ բռնցքամարտը ձեր մարզաձևն է:
-Եթե անկեղծ, զինվորական ծառայությունից հետո որոշել էի հեռանալ բռնցքամարտից: Դա 2018 թվականն էր, երբ բանակում էի: Բայց մտքափոխվեցի, երբ արդեն ավարտել էի ծառայությունս: Վերադարձա, քանի որ կարոտել էի, և ընկերներս էին պնդում, որ կրկին ռինգ մտնեմ:
-Բոլորս մեր մասնագիտությունում կամ կյանքում ունենք մեկին, ով օրինակ է մեզ համար: Դուք ունե՞ք այդպիսի մեկին:
-Մեր հավաքականում, իմ ավագ ընկերը` Հովհաննես Բաչկովը: Կարծում եմ այն օրինակներից է, ումից կարելի է սովորել: Նա իսկապես շատ է օգնել և խորհուրդներով և այլ հարցերով: Նա այն մարդկանցից էր, ով հավատում էր, որ կարող եմ ուղեգիր նվաճել:
-Ո՞րն է բռնցքամարտի գեղեցկությունը, որը դուք` բռնցքամարտիկներդ, տեսնում եք, սակայն մեզ համար այն անտեսանելի է:
-Ես այս մարզաձևի գեղեցկությունը կապում եմ խելքի հետ: Ռինգում պետք է «գրագետ» լինել ու գործել: Պետք է վերահսկես քեզ, էմոցիաներդ, որ կարողանաս հաղթել:
-Ո՞ւմ եք լսում կամ տեսնում ռինգ մտնելիս ու մենամարտի ժամանակ:
-Ուշադրությունս մարզչի կողմն է, քանի որ հենց ինքը գիտի, թե ինչ ճիշտ խորհուրդներ պետք է տա:
-Ասում են, որ մարզիկների դեպքում երկու տարբերակ է գործում՝ տաղանդ կամ աշխատասիրություն: Դուք տաղանդավո՞ր եք, թե աշխատասեր:
-Տաղանդ կամ ունակություններ պետք են, բայց կարևորն աշխատասիրությունն է:
-Եթե հնարավորություն ունենայիք ընտրելու պատմության մեկ մի բռնցքամարտիկի, ո՞ւմ հետ կարող էիք մենամարտել, ո՞ւմ կընտրեիք:
-Երևի, Մուհամեդ Ալիին:
-Դավիթ, այս Օլիմպիական խաղերը ձեր առաջին խաղերն են: Ի՞նչ խորհրդով ու մտքով եք մոտենում Փարիզ-2024-ին:
-Հիմա առավել մեծ պատասխանատվությամբ եմ մոտենում, քանի որ միայն ինձ հաջողվեց ուղեգիր նվաճել: Ամեն ինչ անելու եմ օլիմպիական ռինգից պատվով դուրս գալու համար: Խաղերին մասնակցելու է 16 մարզիկ և մեծամասնությանը ծանոթ եմ:
-Եվ վերջում՝ խնդրում եմ ավարտեք նախադասությունը: Փարիզի Օլիմպիական խաղերն ինձ համար կլինեն…
-… իմ առաջին Խաղերը: