ՌԴ-ում ձերբակալել են 49 մարդու, որոնք կասկածվում են Սիրիայում զինյալներին ֆինանսավորելու մեջ
Ռուսաստանի անվտանգության դաշնային ծառայությունը հաղորդել է ՌԴ-ի տարածաշրջաններում գրեթե 50 մարդու ձերբակալելու մասին, որոնք կասկածվում են Ռուսաստանում արգելված «Քաթիբա Թաուհիդ վալ Ջիհադ» ահաբեկչական կազմակերպության զինյալներին ֆինանսավորելու մեջ:
«Ռուսաստանի Դաշնության Անվտանգության դաշնային ծառայությունը, «Ռոսֆինմոնիթորինգ»-ի և Ռուսաստանի Դաշնության Քննչական կոմիտեի հետ փոխգործակցությամբ, վերացրել է Ռուսաստանում արգելված «Քաթիբա Թաուհիդ վալ Ջիհադ» միջազգային ահաբեկչական կազմակերպության ռեսուրսային ապահովման միջազգային կապուղին, որի համակարգումն իրականացվում էր Սիրիայի Արաբական Հանրապետությունում գտնվող միջազգային ահաբեկչական կազմակերպության էմիսարների կողմից», – փետրվարի 26-ին հաղորդել է հատուկ ծառայության Հանրային կապերի կենտրոնը:
ԱԴԾ-ի տվյալներով՝ Ռուսաստանի 22 տարածաշրջաններում ձերբակալվել են ահաբեկչական ցանցի 49 մասնակիցներ, որոնք մասնակցել են դրամական միջոցների հավաքմանն ու դրանց փոխանցմանը Սիրիայում գործող զինյալներին։
«Բացի այդ, նրանցից ոմանք, օգտագործելով ինտերնետ ռեսուրսները, արմատական իսլամական գաղափարախոսություն են տարածել ՌԴ մուսուլմանական համայնքում և արդարացրել ահաբեկչական գործունեության ծավալումը», – հայտնել են ԱԴԾ-ից:
Քննչական մարմինները քրեական գործեր են հարուցել, հավելել են ԱԴԾ-ում։
