Մենք Ադրբեջանի և Հայաստանի համար խաղաղություն հաստատելու իրական հնարավորություն ենք տեսնում. Ջեյմս Օ’Բրայեն
Մենք Ադրբեջանի և Հայաստանի համար խաղաղություն հաստատելու իրական հնարավորություն ենք տեսնում։ Այս մասին հայտարարել է ԱՄՆ պետքարտուղարի Եվրոպայի եւ Եվրասիայի հարցերով օգնական Ջեյմս Օ՛Բրայենը՝ ճեպազրույցի ժամանակ պատասխանելով լրագրողների հարցերին։
«Մեզ ոգևորում է այն, որ երկու կողմերն էլ միմյանց հետ խոսում են՝ ուղղակիորեն և միջնորդների միջոցով: Եվ դրա շնորհիվ մենք տեսնում ենք ողջ տարածաշրջանին օգուտ բերելու իրական հնարավորություն։ Օրինակ, եթե Կենտրոնական Ասիայից առևտուրը կարողանա հոսել Ադրբեջանի և Հայաստանի տարածքով դեպի Թուրքիա, դա զգալի խթան կլինի այս առևտրային ճանապարհի բոլոր երկրների համար: Եվ մենք ուրախ կլինենք դրա մի մասնիկը դառնալու հնարավորությանը։
Միևնույն ժամանակ, եթե որոշում կայացվի դրան չհասնել խաղաղ ճանապարհով, մենք ստիպված կլինենք օգտագործել բոլոր հնարավոր գործիքները՝ այս տեսակի առևտրային ճանապարհի ստեղծումից խուսափելու համար։ Այսպիսով, մենք կողմերին շատ հստակ ներկայացրել ենք այն, ինչ մենք հույս ունենք տեսնել և այլ կերպ առաջ շարժվելու հետևանքները: Այնպես որ, մենք անհամբեր կսպասենք, թե ինչպես կավարտվի խաղը: Մենք գիտենք, որ նրանք հետաքրքրություն են հայտնել մոտ ապագայում խաղաղության համաձայնագիր կնքելու համար, և մենք կցանկանայինք, որ դա տեղի ունենա»,- ասել է նա։
