Իռլանդիայի վարչապետը դատապարտել է Դուբլինում անկարգությունները․ 34 մարդ ձերբակալվել է
Իռլանդիայի ոստիկանությունը ձերբակալել է գիշերը Դուբլինում անկարգությունների մասնակիցներից 34-ին։ Անկարգությունները և ոստիկանության հետ բախումները տեղի են ունեցել 4 հոգու, այդ թվում՝ 3 երեխայի դանակահարությունից հետո։
BBC-ն հաղորդում է, որ Իռլանդիայի վարչապետ Լեո Վարադկարը նոյեմբերի 24-ին մամուլի ասուլիս է անցկացրել, որի ժամանակ դատապարտել է անկարգությունները և խոստացել, որ դրանց մասնակիցները կպատժվեն օրենքի ողջ ուժով։
Բախումների ընթացքում նաև լուրջ վնասվածքներ է ստացել 1 ոստիկան, թալանվել են խանութներ, վնասվել ոստիկանական մեքենաներ, ավտոբուսներ և տրամվայ։
Ցույցերի պատճառ է դարձել Դուբլինի դպրոցներից մեկի դիմաց երեք երեխաների և մեկ կնոջ դանակահարությունը։ Վիրավորներից 5-ամյա մի աղջիկ գտնվում է ծայրահեղ ծանր վիճակում։
Ոստիկանությունը հայտնել է, որ կալանավորել է դանակահարության կասկածյալին։ Նա մոտ 50 տարեկան տղամարդ է, որը նույնպես վիրավոր է։ Նրա ազգության մասին ոչինչ չի հաղորդվել, սակայն համացանցում լուրեր են շրջանառվում, որ նա օտարազգի է։ Reuters-ը հաղորդում է, որ ոստիկանությունը ծայրահեղ աջերին մեղադրել է անկարգություններ հրահրելու մեջ այն բանից հետո, երբ միգրանտների դեմ հանդես եկող մի խումբ ցուցարարներ ժամանել են դեպքի վայր և բախումների բռնվել իրավապահների հետ։
Լեո Վարադկարը հայտարարել է, որ կառավարությունն անհապաղ քայլեր կձեռնարկի ատելության դեմ օրենսդրությունը խստացնելու ուղղությամբ։
