Կաթողիկոսը հանդիպել է Մայր Աթոռում վերապատրաստման դասընթացներն ավարտած եկեղեցականների հետ
Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը նոյեմբերի 23-ին Մայր Աթոռ Սուրբ Էջմիածնի «Գարեգին Ա» կրթական կենտրոնում հանդիպել է հերթական երեքշաբաթյա վերապատրաստման դասընթացներն ավարտած քահանաներին, ովքեր ժամանել էին Հայաստանի և Սփյուռքի տարբեր թեմերից։ Այս մասին տեղեկացնում են Մայր Աթոռի տեղեկատվական համակարգից:
Մայր Աթոռի լուսարարապետ Գերաշնորհ Տ․ Մուշեղ եպիսկոպոս Բաբայանը, հայցելով Նորին Սրբության օրհնությունը, տեղեկացրել է, որ քահանա հայրերը վերապատրաստման ընթացքում հնարավորություն են ստացել թարմացնելու իրենց աստվածաբանական, ծիսական և պատմական գիտելիքները:
Վերապատրաստման դասընթացներին մասնակից հոգևորականների անունից Ամենայն Հայոց Հայրապետին ողջունել է Ուկրաինայի հայոց թեմի Օդեսայի Սուրբ Գրիգոր Լուսավորիչ եկեղեցու հոգևոր հովիվ Արժանապատիվ Տ․ Աբգար քահանա Գըլըճյանը։ Տեր Հայրն իր երախտագիտությունն է հայտնել Հայոց Հովվապետին Մայր Աթոռում նման դասընթացների կազմակերպման համար՝ վստահություն հայտնելով, որ ձեռքբերված գիտելիքներն առավել կնպաստեն հոգևոր ծառայության արդյունավորմանը։
Այնուհետև Նորին Սրբությունն իր օրհնությունն է փոխանցել հոգևոր հայրերին՝ գոհունակություն հայտնելով վերապատրաստության ծրագրի վերականգնման առիթով: Վեհափառ Հայրապետը կարևորել է Մայր Աթոռում անցկացվող վերապատրաստման այս դասընթացները, որոնք հնարավորություն են ընձեռում տարբեր թեմերից ժամանած եկեղեցականներին համախմբվելու, միմյանցով զորանալու, միասնաբար մտորելու հոգևոր հարցերի շուրջ, ինչպես նաև հոգևոր փորձառությամբ փոխանակվելու։ Իր խոսքում Նորին Սրբությունը հորդորել է քահանա հայրերին սերտացնելու փոխգործակցությունը համայնքների միջև հոգեխնամ առաքելությունն էլ ավելի արդյունավետ դարձնելու համար։
Հայոց Հայրապետը նաև իր գնահատանքն է հայտնել հոգևորականներին ազգին, հայրենիքին ու Եկեղեցուն մատուցած իրենց նվիրյալ ու անսակարկ ծառայության համար։
