Մարիաննա Շահպարոնյանը Կիպրոսի հայ համայնքի ներկայացուցիչներին ներկայացրել է իր «Դեպի Հայաստան» գիրքը
Գրական և մշակույթի համազգային կենտրոնի Կիպրոսի գրասենյակի հրավերով Կիպրոսում կայացել է բանաստեղծուհի, «Դեպի Հայաստան գրքի հեղինակ Մարիաննա Շահպարոնյանի հանդիպումը Նիկոսիայի հայ համայնքի ներկայացուցիչների հետ։
Հանդիպումն անցել է ջերմ մթնոլորտում։ Կիպրոսի հայ համայնքի ներկայացուցիչները մեծ ոգևորությամբ են ընդունել բանաստեղծուհուն և բարձր գնահատականի արժանացրել հայրենիքին նվիրված նրա բանաստեղծությունները։
Միջոցառման ընթացքում համայնքը ներկայացնող պատանիներից մեկն ասմունքել է Շահպարոնյանի՝ հունարեն թարգմանված բանաստեղծությունները։
«Կայացած և շնորհալի համայնք ունենք Կիպրոսում։ Հայրենիքից հեռու բնակվելով՝ նրանք ջանք և եռանդ չեն խնայում հայի ինքնությունը պահպանելու և ապագա հայրենասեր սերունդներ դաստիարակելու համար։ Այդ առումով նրանց կատարած աշխատանքները օրինակելի եմ համարում։ Հպարտ եմ և շատ ուրախ, որ հյուրընկալվել եմ այս գաղթօջախում և ներկայացրել իմ «Դեպի Հայաստան» գիրքը»,- ասում է բանաստեղծուհին։
Կիպրոս կատարած այցի ընթացքում բանաստեղծուհին այցելել է Նիկոսիայում գտնվող Սուրբ Աստվածածին եկեղեցի, ինչպես նաև Հայաստանի և Կիպրոսի միջև բարեկամությունը խորհրդանշող հուշարձան։
Մարիաննա Շահպարոնյանի հանդիպումները Սփյուռքում շարունակական բնույթ են կրում։
Շուտով բանաստեղծուհին իր գիրքը կներկայացնի Բարսելոնայի հայ համայնքին:
