Ռուբեն Վարդանյանի գերեվարման պատճառն այն է, որ նա օգնել է Արցախին. «Ավրորայի» հայտարարությունը
Երևանում ի աջակցություն Ռուբեն Վարդանյանի և Ադրբեջանի կողմից գերեվարված Արցախի ռազմական ու քաղաքական գործիչների երթ է անցկացվում:
«Ավրորա» մարդասիրական նախաձեռնության ղեկավար Արման Ջիլավյանը երթի մեկնարկից առաջ ընթերցեց «Ավրորա»-ի հայտարարությունը, որին միացել են «Ավրորա» մրցանակի դափնեկիր բազմաթիվ հանրային ու քաղաքական գործիչներ ամբողջ աշխարհից.
«Բարերար, գործարար, Հայաստանի Հանրապետության քաղաքացի և «Ավրորա» մարդասիրական նախաձեռնության համահիմնադիր Ռուբեն Վարդանյանի ձերբակալությունն Ադրբեջանի կառավարության կողմից վրդովեցուցիչ է և ունի քաղաքական դրդապատճառներ: Որպես մարդասիրական և մարդու իրավունքների համաշխարհային համայնքի անդամներ՝ մենք կոչ ենք անում անհապաղ ազատ արձակել նրան:
«Ավրորա» մարդասիրական նախաձեռնությունը, որի համար Ռուբենը մեծ ջանքեր է ներդրել, վերջին ութ տարիների ընթացքում արժանին է մատուցել և աջակցել նրանց, ովքեր պայքարում են մարդու հիմնարար իրավունքների համար ամբողջ աշխարհում՝ հաճախ վտանգելով սեփական կյանքը: Ճակատագրի հեգնանքով այժմ Ռուբենն ինքն է դարձել նույն հալածանքի զոհը, ինչպես այն հերոսները, որոնց նա փորձել է օգնել՝ որպես մարդու իրավունքների պաշտպանության ջատագով:
Երբ ավելի քան մեկ տարի առաջ Ռուբենը տեղափոխվեց Լեռնային Ղարաբաղ՝ մինչև 10-ամսյա շրջափակումը, սննդամթերքի և առաջին անհրաժեշտության ապրանքների մուտքի արգելափակումը և վերջին ռմբակոծությունները, նա արեց դա՝ գիտակցելով, թե որքան մեծ են ռիսկերը: Բայց նա վճռական էր՝ օգնելու խաղաղ լուծում գտնելու հակամարտությանը։
Ռուբենի ձերբակալությունը՝ մի մարդու, որն իր կյանքի վերջին 20 տարին նվիրել է տարածաշրջանում սոցիալ-տնտեսական զարգացումը խթանելու գործին, արդար չէ: Սա զրկում է նրան իր հիմնարար իրավունքներից, ինչպես և տարածաշրջանում տասնյակ-հազարավոր հայերի, որոնց հիմնարար իրավունքները ոտնահարվում են ամեն օր:
Ռուբեն Վարդանյանի գերեվարման պատճառն այն է, որ նա աջակցել է Լեռնային Ղարաբաղի ժողովրդին և օժանդակել ժողովրդավարության տառին համաձայն ապրելու իրավունքի իրացմանը:
Ադրբեջանի կառավարությունը պետք է ազատ արձակի նրան և ցույց տա իր հարգանքը մարդու իրավունքների նկատմամբ՝ նրա և տարածաշրջանի բոլոր հայերի իրավունքների:
Ստորագրողներ՝ Ֆարթուն Ադան-2020 թ. «Ավրորա» մրցանակի դափնեկիր, «Էլման» խաղաղության և մարդու իրավունքների կենտրոնի հիմնադիր
Նուբար Աֆեյան- «Ավրորա» մարդասիրական նախաձեռնության համահիմնադիր, Flagship Pioneering ընկերության հիմնադիր և գլխավոր գործադիր տնօրեն, «Մոդերնա» ընկերության համահիմնադիր և նախագահ
Ջամիլա Աֆղանի – 2022 թ. «Ավրորա» մրցանակի դափնեկիր, Աֆղանստանում Խաղաղության և ազատության կանանց միջազգային լիգայի նախագահ
Օսկար Արյաս- «Ավրորա» մրցանակի Ընտրող հանձնաժողովի պատվավոր անդամ, Կոստա Ռիկայի նախկին նախագահ, Խաղաղության Նոբելյան դափնեկիր
Մարգարիտ Բարանկիցե -2016 թ. «Ավրորա» մրցանակի դափնեկիր, «Խաղաղության տուն» խնամքի կենտրոնի հիմնադիր
Լեյմա Գբովե -«Ավրորա» մրցանակի Ընտրող հանձնաժողովի անդամ, Աֆրիկայի «Գբովե» խաղաղության հիմնադրամի հիմնադիր և նախագահ, Խաղաղության Նոբելյան դափնեկիր
Արա Դարզի-«Ավրորա» մրցանակի Ընտրող հանձնաժողովի նախագահ, Լոնդոնի կայսերական քոլեջի Գլոբալ առողջապահական նորարարությունների ինստիտուտի համաղեկավար
Միրզա Դինայի-2019 թ. «Ավրորա» մրցանակի դափնեկիր, «Լյուֆթբրյուքե Իրաք» (Օդային կամուրջ Իրաք) կազմակերպության համահիմնադիր և տնօրեն
Շիրին Էբադի-«Ավրորա» մրցանակի Ընտրող հանձնաժողովի պատվավոր անդամ, Իրավապաշտպանների կենտրոնի հիմնադիր, Խաղաղության Նոբելյան դափնեկիր
Իլվադ Էլման-2020 թ. «Ավրորա» մրցանակի դափնեկիր, «Էլման» խաղաղության և մարդու իրավունքների կենտրոնի գործառնությունների գծով տնօրեն
Գարեթ Էվանս-«Ավրորա» մրցանակի Ընտրող հանձնաժողովի պատվավոր անդամ, Ավստրալիայի նախկին արտգործնախարար, Միջազգային ճգնաժամային խմբի պատվավոր նախագահ
Հինա Ջիլանի -«Ավրորա» մրցանակի Ընտրող հանձնաժողովի պատվավոր անդամ, Պակիստանի Գերագույն դատարանի փաստաբան, Մարդու իրավունքների պաշտպանության ոլորտում ՄԱԿ-ի գլխավոր քարտուղարի նախկին հատուկ ներկայացուցիչ
Լուիզ Ռիչարդսոն-«Ավրորա» մրցանակի Ընտրող հանձնաժողովի անդամ, Նյու Յորքի Կարնեգի կորպորացիայի նախագահ
Մերի Ռոբինսոն-«Ավրորա» մրցանակի Ընտրող հանձնաժողովի անդամ, The Elders խմբի նախագահ, ՄԱԿ-ի Մարդու իրավունքների հարցերով նախկին գերագույն հանձնակատար, Իռլանդիայի նախկին նախագահ
Էռնեստո Սեդիլյո-«Ավրորա» մրցանակի Ընտրող հանձնաժողովի անդամ, Յեյլի համալսարանի Գլոբալիզացիայի ուսումնասիրությունների կենտրոնի տնօրեն, Մեքսիկայի նախկին նախագահ
Փոլ Փոլման-«Ավրորա» մրցանակի Ընտրող հանձնաժողովի անդամ, գործարար-առաջնորդ, կլիմայի և իրավահավասարության հարցերի պաշտպան, Unilever ընկերության նախկին գլխավոր գործադիր տնօրեն
Ջոն Փրենդերգասթ-«Ավրորա» մրցանակի Ընտրող հանձնաժողովի անդամ, մարդու իրավունքների ակտիվիստ
Թոմ Քաթինա -«Ավրորա» մարդասիրական նախաձեռնության նախագահ, 2017 թ. «Ավրորա» մրցանակի դափնեկիր, «Գթության Մայր» հիվանդանոցի բժշկական տնօրեն
Դելե Օլոջեդե- «Ավրորա» մրցանակի Ընտրող հանձնաժողովի անդամ, Africa in the World գաղափարների փառատոնի հիմնադիր, Պուլիցերյան մրցանակի դափնեկիր»:
Հիշեցնենք՝ Արցախի նախկին պետնախարար Ռուբեն Վարդանյանը, որն անգնահատելի ավանդ է ներդրել Արցախի և Հայաստանի կյանքում ոչ միայն որպես հասարակական և պետական գործիչ, այլև որպես մեկենաս և գործարար, սեպտեմբերի 27-ին առևանգվել է Ադրբեջանի ԶՈւ կողմից: Նրա դեմ առաջադրվել են անհեթեթ և շինծու մեղադրանքներ։
Ադրբեջանական ԶԼՄ-ները սեպտեմբերի 30-ին տեղեկացրել են նաև Արցախի նախկին արտգործնախարար Դավիթ Բաբայանի, Արցախի Պաշտպանության բանակի նախկին հրամանատար Լևոն Մնացականյանի, Արցախի պաշտպանության նախկին փոխնախարար Դավիթ Մանուկյանի ձերբակալման մասին։
