Ճանաչեցինք Ադրբեջանի տարածքային ամբողջականությունը, որովհետև մեր դաշնակիցները լուռ էին. Փաշինյանը պատասխանում է պատգամավորների հարցերին. ՈՒՂԻՂ
Ադրբեջանի տարածքային ամբողջականությունը ճանաչելու որոշումը Հայաստանն ընդունել է սեփական տարածքային ամբողջականությունը պաշտպանելու նկատառումով, որովհետև այն իրավիճակում, երբ Ադրբեջանը գրոհում է Հայաստանի տարածքը ու գրավում է տարածքներ, իսկ Հայաստանի դաշնակիցները լուռ են ու չեն արձագանքում, Հայաստանը պարտավոր էր հոկտեմբերի 6-ին գալ այդ համաձայնությանը` սեփական ինքնիշխանությունն ու տարածքային ամբողջականությունը արձանագրելու համար: Այս մասին այսօր՝ սեպտեմբերի 13-ին, Ազգային ժողով-Կառավարություն հարցուպատասխանի ժամանակ հայտարարեց վարչապետ Նիկոլ Փաշինյանը:
Փաշինյանը անդրադառնալով Ալմաթիի հռչակագրին՝ ասաց, որ Հայաստանի Հանրապետության անկախության միջազգային վկայագիրն է:
Նրա խոսքով՝ պայմանավորվածություն է ձեռք բերվել, որ Հայաստանն ու Ադրբեջանը ճանաչում են միմյանց տարածքային ամբողջականությունն ու ինքնիշխանությունը Ալմաթիի հռչակագրի հիման վրա:
«1993 թվականի անվտանգության խորհրդի 4 բանաձևերին Ռուսաստանի Դաշնությունը կողմ է քվեարկել, եթե կողմ չքվեարկեր, այդ բանաձևերը չէին կարող ընդունվել: Ըստ այդ բանաձևերի՝ Ադրբեջանի Հանրապետության Լեռնային Ղարաբաղի տարածաշրջանում, այդ ձևակերպումների մեջ արձանագրված է Ադրբեջանի և տարածաշրջանի երկրների սահմանների անխախտելիության սկզբունքը, ուժի կիրառմամբ ձեռքբերումների լեգիտիմացնելու անթույլատրելիությունը և այդպես շարունակ: Լիսաբոնի գագաթնաժողովի այն ձևակերպմանը, Լեռնային Ղարաբաղի հարցը պետք է լուծվի ինքնորշման իրավունքի կիրառմամբ և Լեռնային Ղարաբաղը պետք է ինքնավարություն ստանա Ադրբեջանի կազմում, այդ ձևակերպմանը կողմ է եղել նաև Ռուսաստանի Դաշնությունը, հակառակ դեպքում Հայաստանի Հանրապետությունը վետօ կիրառելու անհրաժեշտություն չէր ունենա և նաև Ռուսաստանի Դաշնությունն է լիազորել Լիսաբոնի գագաթաժողովի նախագահողին՝ հանդես գալ նման հայտարարությամբ: 2020 թվականի նոյեմբերին և դեկտեմբերին ՌԴ-ն հայտարարել է, որ ԼՂ-ն Ադրբեջանի միջազգայնորեն ճանաչված տարածք է»,- ասաց Փաշինյանը:
Նա նշեց, որ Ադրբեջանի հետ ռազմավարական հռչակագրում ՌԴ-ն ընդունել է Ադրբեջանի տարածքային ամբողջականությունը.
ՌԴ դիրքորոշմամբ՝ ԼՂ-ի կարգավիճակը պետք է անորոշ ժամանակով հետաձգվեր: Այդ առաջարկությունը տարածաշրջան է բերել 2022 թվականի հուլիսի վերջին օգոստոսի սկզբին ՌԴ ԱԳՆ ներկայացուցիչը և Հայաստանին ու Ադրբեջանին է ներկայացրել: ՌԴ ներկայացուցիչ Խովաեվը տարածաշրջան է եկել 2022 թվականի սեպտեմբերին պատասխանը ստանալու համար. առաջինը այցելել է Ադրբեջանը, եղել է սեպտեմբերի 11-12-ին և Հայաստան է եկել սեպտեմբերի 13-ին և 13-ի գիշերը Ադրբեջանի զինված ուժերը լայնածավալ հարձակում են սկսել Հայաստանի ինքնիշխան տարածքի նկատմամբ: ՀԱՊԿ-ը և ՌԴ-ն ՀՀ-ի գրավոր և բանավոր դիմումներին՝ կատարել օրենսդրությամբ և պայմանագրով սահանված պարտավորությունները չի արձագանքել: Հայաստանը դրական է արձագանքել ՌԴ-ի առաջարկին, որը ներկայացրել էր ՌԴ ներկայացուցիչը: Հոկտեմբերի 6-ին պայմանավորվածություն է ձեռք բերվել, որ Հայաստան ու Ադրբեջանը ձեռք են բերում պայմանավորվածություն միմյանց տարածքային ամբողջականությունը և ինքնիշխանությունը Ալմաթիի հռչակագրի արձանագրության հիման վրա ընդունելու վերաբերյալ: Այդ որոշումը Հայաստանն ընդունել է սեփական տարածքային ամբողջականությունը պաշտպանելու նկատառումով, որովհետև այն իրավիճակում, երբ Ադրբեջանը գրոհում է Հայաստանի տարածքը ու գրավում է տարածքներ, իսկ Հայաստանի դաշնակիցները լուռ են ու չեն արձագանքում, Հայաստանը պարտավոր էր հոկտեմբերի 6-ին գալ այդ համաձայնությանը` սեփական ինքնիշխանությունն ու տարածքային ամբողջականությունը արձանագրելու համար: Նրանք, ովքեր ասում են, որ սա սխալ որոշում է, նրանք ասում են, որ Հայաստանը չպետք է լինի ինքնիշխան պետություն»:
