Հեքիաթները, թե «մենք մենակ ենք մնացել» թուրք-ադրբեջանական տանդեմի առջև ընդամենը անգրագետ «ֆանտազիաներ» են. Արման Աբովյան

Ակտիվ դիվանագիտությունը և նոր, աշխարհաքաղաքական հնարավորությունների որոնումը եղել և մնում է յուրաքանչյուր պետության անվտանգության համալիր համակարգի ստեղծման հիմքը։ Սա աքսիոմատիկ ճշմարտություն է։ Սակայն պետք չէ լինել քաղաքագետ հասկանալու համար, որ ներկայիս հայկական իշխանության գործողությունները (ավելի ճիշտ խայտառակ անգործությունը) արտաքին անվտանգության ապահովման առումով խիստ նվազեցրել են մեր երկրի ներուժը անվտանգության բազմամակարդակ համակարգի ձևավորման գործում, ինչը բնականաբար խիստ ձեռնտու է Թուրքիային և Ադրբեջանին։

Չնայած արդարության համար պետք է նշել Հայաստանի և Հնդկաստանի ռազմական համագործակցությունը բավական ակտիվ զարգանում է, որն ավելի շուտ բացառություն է կանոններից, քան միտում։ Այս պարագայում պետք է նշել Հայաստանի համար բավականին լավ հեռանկարների առկայությունը «նոր երկրների, հին բարեկամների» հետ հարաբերությունների ընդլայնման առումով։

Օրինակ ՝ Հնդկաստանի հետ համագործակցությունը, Իրանի և Հունաստանի հետ հարաբերությունների զարգացման հետ մեկտեղ, հսկայական ներուժ ունի։ Եթե խոսենք «կենցաղային» լեզվով, ապա մենք պարզապես պետք է հաշվարկենք, թե խոշոր խաղացողներից ում է «ձեռնտու» Հայաստանի և Արցախի ֆիզիկական գոյությունը տարածաշրջանում։ Ռուսաստան, Իրան, Ֆրանսիա, Հունաստան, Չինաստան եւ, անշուշտ, ևս մի քանի տասնյակ երկրներ ՝ ավելի նվազ աշխարհաքաղաքական ներուժով։

Իհարկե, դա բխում է ոչ միայն մեր հանդեպ այդ երկրների «սիրուց», այլ մեծ մասամբ «թուրանական» էքսպանսիան զսպելու պրագմատիկ հաշվարկից, սակայն հենց շահերի համընկնումն է այն հիմքը, որի վրա կառուցվում են ամուր հարաբերությունները։ Եվ այստեղ շատ կարևոր է ուշադրություն դարձնել հնդկա-հունական հարաբերություններին, որոնք մտնում են ակտիվ զարգացման փուլ։

Հնդկական մամուլը գրում է.

ETV Bharat. «Հնդկաստանի համար կարեւոր է զարգացնել ռազմավարական գործընկերությունը Հունաստանի հետ ՝ Թուրքիայի վրա ճնշումը մեծացնելու համար»: Նարենդրա Մոդին օգոստոսի 25-ին պատմական- դիվանագիտական այցով կմեկնի Հունաստան, որը կդառնա Հնդկաստանի վարչապետի առաջին այցը երկիր վերջին 40 տարվա ընթացքում:

Հատկանշական է, որ Մոդին կդառնա Հնդկաստանի առաջին վարչապետը, ով Հունաստան կայցելի 1983 թվականին Ինդիրա Գանդիի ժամանակներից ի վեր:

Հնդկաստանի նախկին դեսպան Ջիթենդրա Տրիպատի. «Վարչապետ Մոդիի այցը Հունաստան ուղերձ կլինի Թուրքիային, մի երկրի, որը Հնդկաստանի հակառակորդն է եղել և մեր դեմ է տրամադրված բոլոր կետերով: Թուրքիան միշտ հաստատակամ է եղել Ջամուի և Քաշմիրի հարցում Պակիստանին աջակցելու հարցում։ Թուրքիայի հակահնդկական կեցվածքը մեզ ստիպում է ձեռնարկել համապատասխան քայլեր։ 40 տարի անց վարչապետ Մոդիի այցը Հունաստան վկայում է այն միտման մասին, որ Միջերկրական ծովի շատ երկար անտեսումից հետո Հնդկաստանն այժմ պատրաստ է ընդլայնել իր ներկայությունը աշխարհի այն մասում, որը աշխարհաքաղաքական նշանակություն ունի, ինչպես նաև շատ կարևոր է աշխարհատնտեսական առումով, քանի որ Հնդկաստանը նոր ուղիներ է փնտրում Եվրասիայի այլ երկրների հետ կապեր հաստատելու համար”:

Այնպես որ, Հայաստանի ներկայիս իշխանության բոլոր թուրքամետ հեքիաթներն այն մասին, թե «մենք մենակ ենք մնացել» թուրք-ադրբեջանական տանդեմի առջև ընդամենը անգրագետ «ֆանտազիաներ» են, որոնք կոչված են արդարացնելու Հայաստանի ներկայիս իշխանությունների հակահայկական քաղաքականությունը։

Հայաստանի և Արցախի նկատմամբ թուրքական ախորժակը զսպելու ամուր, բազմամակարդակ համակարգ ձևավորելու ներուժ կա, պարզապես ցանկություն և քրտնաջան աշխատանք է պետք այդ ուղղությամբ։

Խնդիրը ընդամենը Հայաստանի իշխանությունների թուրքամետ ու ադրբեջանամետ տեսլականի մեջ է։

Արման Աբովյան