ՌԴ-ում հայտնել են, որ Ղրիմի կամուրջը պայթեցրել են ուկրաինական վերջրյա ԱԹՍ-ները, Զախարովան մեկնաբանել է միջադեպը
Ղրիմի կամրջի վրա հարձակումն իրականացվել է երկու վերջրյա անօդաչու թռչող սարքերի միջոցով։ Այս մասին ТАСС-ին հայտնել են ՌԴ ազգային հակաահաբեկչական կոմիտեի տեղեկատվական կենտրոնում։
«Ժամը 03:05-ին ուկրաինական երկու վերջրյա անօդաչու սարքեր գրոհել են Ղրիմի կամրջի վրա», – ասվում է հաղորդագրության մեջ։
ՌԴ Քննչական կոմիտեն քրեական գործ է հարուցել «Ահաբեկչություն» հոդվածով։
Միջադեպի հետևանքով զոհվել է 1 տղամարդ և 1 կին, նրանց 14-ամյա դուստրը վիրավորվել է։
ՌԴ ԱԳՆ պաշտոնական ներկայացուցիչ Մարիա Զախարովան, մեկնաբանելով Ղրիմի կամրջի վրա տեղի ունեցած պայթյունը, հայտնել է, որ «Կիևի վարչակարգն ահաբեկչական է», և որ ուկրաինական պաշտոնատար անձինք «որոշումները կայացնում են ամերիկյան և բրիտանական հատուկ ծառայությունների և քաղաքական գործիչների անմիջական մասնակցությամբ»։
РБК-Украина պարբերականը, հղում անելով Ուկրաինայի անվտանգության ծառայության իր աղբյուրներին, հաղորդում է, որ Ղրիմի կամրջի վրա հարձակումը Ուկրաինայի զինված ուժերի ռազմածովային ուժերի և Անվտանգության ծառայության իրականացրած հատուկ գործողություն է։
Ուկրաինայի անվտանգության ծառայությունը Ղրիմի կամրջի պայթյունին սոցցանցերի իր պաշտոնական էջերում անդրադարձել է բանաստեղծությամբ։
