Սերժ Սարգսյանը, Ռոբերտ Քոչարյանը, Արցախը, բանակն ու եկեղեցին Փաշինյանի և Թուրքիայի ընդհանուր թշնամին են. Էլբակյան
Անկախ նրանից, որ հայ-ադրբեջանական բանակցային գործընթացը թևակոխել է ակտիվ փուլ, միևնույն է, Հայաստանի իշխանությունը որևէ բան այդ բանակցություններում չի որոշում, ավելին, եթե համաշխարհային դերակատարները բանակցային գործընթացում շահագրգռվածություն չցուցաբերեն, դրանք առհասարակ տեղի չեն ունենա։
168 TV-ի «Ռեվյու» հաղորդաշարի եթերում, խոսելով Քիշնևից հետո մինչև հոկտեմբեր Հայաստանի և Ադրբեջանի ղեկավարների մակարդակով պլանավորված հանդիպումների մասին, նման տեսակետ հայտնեց քաղաքագետ Էդգար Էլբակյանը։
«Բանակցություններից հետո թուղթ ընդհանրապես կարող է և չստորագրվել, որովհետև անկախ դրանից, քանի այս իշխանությունն է, ամեն օր թուլանում է Հայաստանը։ Թղթի ստորագրումն ավելի շատ ձեռնտու է Հայաստանի դե ֆակտո իշխանությանը, որովհետև այդ կերպ կբավարարեն իր կադաստրի վկայականի մարմաջը»,- ասաց Էլբակյանը։
Ըստ քաղաքագետի՝ ՀՀ դե ֆակտո իշխանությունը, որը 20 տարի ընդդիմացել է Հայաստան գաղափարին, հիմա այդ գաղափարի դեմ ընդվզելու հարցում ունի Թուրքիայի և Ադրբեջանի աջակցությունը, ուստի պատահական չէ այս իշխանության հայանպաստ քայլերի բացակայությունը, փոխարենը՝ ակնհայտ են սեփական իշխանությունը պահպանելուն ուղղված քայլերը։
«Այս իշխանության արտաքին շահառուն Թուրքիան է, նաև Ադրեջանը։ ՀՀ այս իշխանությունը կարողանում է իշխանությունը պահպանել Թուրքիայի և Ադրբեջանի շնորհիվ։ Ասվածի ապացույցը ՀՀ Գլխավոր շտաբի տարածած հայտարարությունն էր, որի ծավալումը կասեցրել է հենց Թուրքիան՝ հասկացնելով, որ ցամաքային ներխուժում կիրականացնի։ Դա ակնհայտ է դառնում, երբ արձանագրում ես նաև, որ Փաշինյանի և Թուրքիայի համար արտաքին թշնամին նույնն է։ Թուրքիան և Հայաստանի այս իշխանությունն ունեն նաև ընդհանուր թշնամիներ՝ հայկական բանակը, Հայոց եկեղեցին, ՀՀ նախկին նախագահներ Սերժ Սարգսյանը և Ռոբերտ Քոչարյանը, Արցախը, հայ գեներալները, որոնք բանտում են։ Կրկնում եմ՝ լևոնականների, կապիտուլյանտականների, թուրքերի և ադրբեջանցիների ընդհանուր թշնամիները նույնն են, իսկ եթե արտաքին թշնամիների հայելային համընկնում կա, դա վկայությունն է այն բանի, որ իրենք նույն քաղաքականության կրողն են»,- ասաց Էլբակյանը։
Հարցազրույցի մանրամասները՝ տեսանյութում։