Իրանի նախագահը Սիրիա է ժամանել 12 տարվա ընթացքում առաջին անգամ
Իրանի նախագահ Էբրահիմ Ռայիսին այսօր առավոտյան պաշտոնական այցով ժամանել է Սիրիա. սա Իրանի նախագահի առաջին այցն է երկիր 2011 թ.-ին ՍԱՀ-ում հակամարտության սկսվելուց ի վեր: Այս մասին հաղորդում է IRNA գործակալությունը:
Ռայիսին Սիրիա է մեկնել այդ երկրի նախագահ Բաշար ալ Ասադի պաշտոնական հրավերով: Երկու ղեկավարները կհանդիպեն Դամասկոսի նախագահական պալատում: Այցի ընթացքում Ռայիսիին ուղեկցում են 4 նախարարներ, Իրանի ԿԲ նախագահը, Իրանի նախագահի աշխատակազմի ղեկավարը և Ռայիսիի գլխավոր քաղաքական խորհրդատուն:
Իր հերթին «РИА Новости»-ի թղթակիցը հայտնել է, որ Դամասկոսի միջազգային օդանավակայանում Ռայիսիին դիմավորել է Սիրիայի էկոնոմիկայի նախարար Մուհամեդ Սամեր ալ Խալիլը։
Սիրիական Al-Watan թերթն ավելի վաղ գրել էր, որ Ռայիսիի այցը կտևի երկու օր: Իրանի և Սիրիայի նախագահների միջև պաշտոնական բանակցություններ կանցկացվեն երկու երկրների ռազմավարական համագործակցությունը ամրապնդելու շուրջ։
Թերթի տեղեկատվության համաձայն՝ Ռայիսիի այցի ընթացքում Իրանի և Սիրիայի միջև մեծ թվով պայմանագրեր և փոխըմբռնման հուշագրեր կստորագրվեն տնտեսության ոլորտում։
