Կինը՝ պաշտպանության նախարար. Հանրայինում նոր ֆիլմ է նկարահանվում. ով է պատվիրատուն. armlur.am
ArmLur.am-ի տեղեկությունների համաձայն՝ Հանրային հեռուստաընկերությունը ներկայումս նկարահանում է մի քանի մասից բաղկացած գեղարվեստական ֆիլմ: Այդ ֆիլմի սյուժեի հիմքում Պաշտպանության նախարարությունն է, որի միջոցով փորձում են առաջին պլան մղել կին զինվորականին և նրան դարձնել Պաշտպանության նախարար, սակայն հանդիպում է բազում խոչընդոտների: Հենց այս ամենի շուրջ էլ հյուսվում է ողջ ֆիլմի պատմությունը:
Ավելին, մեզ հասած տեղեկությունների համաձայն, Հանրային հեռուստաընկերությանը նման ֆիլմի նկարահանումը պատվիրել է ՀՀ վարչապետի տիկին Աննա Հակոբյանը եւ այն հավանաբար կկոչվի ՝ «Տիկին պաշտպանության նախարարը»:
ArmLur.am-ը մեկնաբանության համար դիմեց Հանրային հեռուստաընկերության հասարակայնության հետ կապերի ծառայություն, որտեղից մեզ հայտնեցին, որ Հանրային հեռուստաընկերությունը նման բովանդակությամբ ֆիլմ արտադրել եւ ցուցադրել չի պլանավորում:
Սակայն ի հակադրություն Հանրային հեռուստաընկերության՝ ArmLur.am-ի հետ զրույցում դերասան Գուրգեն Սարգսյանը հաստատեց մեր տեղեկությունը: Ավելին դերասանի խոսքով՝ այս պահին ընթանում են ֆիլմի համար նկարահանումները, բայց ֆիլմի մասին փակագծեր բացել չցանկացավ:
