Ինչպես է արձագանքել Ռուսաստանը ՀՀ տարածքում իր երկու զինծառայողների թիրախավորման փաստին. մեկնաբանում է Զախարովան
«Կան արձագանքի տարբեր եղանակներ, պարտադիր չէ՝ այն լինի բարձրախոսի մոտ»,- այս մասին այսօր լրագրողների հետ հանդիպմանն ասաց ՌԴ ԱԳՆ պաշտոնական ներկայացուցիչ Մարիա Զախարովան՝ անդրադառնալով օրերս հայ-ադրբեջանական սահմանի հայկական հատվածում ադրբեջանցիների կողմից ռուս երկու զինծառայողներին թիրախավորելուն:
Հիշեցնենք, որ «Տոգարմա» տելեգրամյան ալիքը գրել է, որ ռուսական կողմը դիմել էր ադրբեջանական կողմին՝ թույլատրել որոնողական աշխատանքներ իրականացնել, Ադրբեջանը սկզբում թույլատրել է, այնուհետ հայտնել, որ կորած հայ զինծառայողն արդեն իրենց մոտ է:
Ավելին, ըստ տելեգրամյան ալիքի, ադրբեջանական զինուժն ինքն է մատնանշել, որոշել ռուսական զինուժի ժամանման կետը, վայրը: Տեղ հասնելուն պես ռուսական զինուժն ընկել է ադրբեջանական թիրախավորված կրակի տակ, նախազգուշական կրակոցներ չեն եղել: Այսինքն, եղել է նախապես ծրագրված դարանակալում: Ադրբեջանական կողմը չէր կարող շփոթել ռուսական զինծառայողներին հայ զինծառայողների հետ, քանի որ շատ լավ գիտեին նրանց ժամանման վայրը, ժամանակը, եթե չասենք՝ իրենք էին այդտեղ հրավիրել ռուս զինծառայողներին: Ադրբեջանական կողմի թիրախավորման արդյունքում ռուս զինծառայողները վիրավորում են ստացել գլխի շրջանում:
Զախարովան ասաց, որ տեղի ունեցածի հանգամանքները հստակեցվում են ՌԴ ՊՆ մակարդակով:
«Ես կարծում եմ, որ մենք ամեն դեպքում պետք է սպասենք այդ հետաքննության արդյունքներին, և երբ դրանք լինեն, ես կկարողանամ մեկնաբանել:
Ինչ վերաբերում է արձագանքին՝ կտրուկ, մեղմ, տարբեր, տարբեր դեպքերում տարբեր միջադեպերին տարբեր արձագանք է լինում: Կա նաև շատ փոքր, բայց կարևոր նրբություն՝ արձագանքը լինում է ոչ միայն հրապարակային, մեր երկխոսությունը զարգանում է գրեթե անխափան ռեժիմով: Հուսով եմ՝ չեք կարծում, որ եթե չի ասվում բարձրախոսի մոտ, ապա չի ասվում նաև հեռախոսով, տետ ա տետ, գրագրության ընթացքում և այլն: Ուստի մեզ մոտ տարբեր դաշնակիցների, գործընկերների, բարեկամների հետ կան մեր դիրքորոշումները տարբեր հարցերի շուրջ տեղ հասցնելու տարբեր եղանակներ»,- ակնարկեց Զախարովան:
