Հավելյալ 50 միլիոն դրամ՝ ՊՊԾ-ին՝ գործուղումների համար

Կառավարությունը 50 միլիոն դրամ է հատկացրել Պետական պահպանության ծառայությանը՝ արտասահմանյան գործուղումների ծախսերն ապահովելու նպատակով։

Համապատասխան որոշումը գործադիրն ընդունել է հոկտեմբերի 13-ի նիստում՝ օրակարգում ընդգրկված չզեկուցվող հարցերի նախագծով: Ըստ արդեն ընդունված նախագծի՝ 50 միլիոն դրամը ՀՀ ազգային անվտանգության ծա­ռայության պետական պահպանության ծառայությանը հատկացվել է 2022 թվականի ՀՀ պե­տա­կան բյուջեով նախատեսված պահուստային ֆոնդից:

Պետական պաշտոնյաների և հատուկ պահպանվող շինությունների անվտանգությունն ապահովող պետական պահպանության ծառայությանը սա հերթական հավելյալ հատկացումն է. ավելի վաղ Կառավարությունը 124 մլն 330 հազար դրամ էր հատկացրել այս կառույցին՝ չնշելով գումարի ծախսման ուղղությունը։

Ուշագրավ է, որ տարին դեռ չի ավարտվել և արտասահմանյան գործուղումների համար հավելյալ 50 միլիոն դրամ է բյուջեից ուզում մի կառույց, որին 2022 թվականի բյուջեով նախորդ տարվա համեմատ հատկացվել է 22.8 տոկոսով ավելի ֆինանսավորում։

Հիշեցնենք՝ 2022 թ.-ին ԱԱԾ-ին հատկացվել է 42 մլրդ 669 մլն դրամ, որը 2021 թվականի հաստատված բյուջեի նկատմամբ ավելին էր 22.85 %-ով, 2021 թվականին այն եղել էր 34 մլրդ 733 մլն դրամ։