Գյումրիում մեկնարկել է «Gyumri open» շախմատի միջազգային մրցաշարը
Գյումրիի մարզամշակութային կենտրոնում մեկնարկել է «Gyumri open» շախմատի միջազգային մրցաշարը: Արդեն երկրորդ անգամ անցկացվող այս միջոցառմանը մասնակցում են Հայաստանի, Արցախի, Արաբական Միացյալ Էմիրությունների, Ռուսաստանի, Ինդոնեզիայի, Իսպանիայի, Իրանի, Լիբանանի, Հնդկաստանի, ինչպես նաև ՖԻԴԵ–ի դրոշի ներքո հանդես եկող 211 շախմատիստներ։
Մրցաշարն անց է կացվում երկու տարիքային խմբերում։ Առաջին՝ «Ա» խմբում պայքարում են ՖԻԴԵ–ի վարկանիշ ունեցող 73 շախմատիստ, այդ թվում՝ ՖԻԴԵ–ի միջազգային վարպետներ, վարպետներ ու սպորտի վարպետներ։ Երկրորդ՝ «Բ» խմբում ընդգրկված են մինչև 12 տարեկան 138 պատանի շախմատիստներ:
«Մրցումները անցկացվում են շվեյցարական մրցակարգով՝ բաղկացած 9 տուրից։ Մրցաշարի ընդհանուր մրցանակային ֆոնդը երկու միլիոն դրամ է։ Միջոցառման ընթացքում՝ օգոստոսի 10-ին և 13-ին կանցկացվեն նաև բլից մրցաշարեր։ Մրցումները կեզրափակվեն օգոստոսի 16–ին» ,- նշեց Շիրակի մարզպետարանի տեղեկատվության ու հասարակայնության հետ կապերի բաժնի պետ Արաքսյա Կիրակոսյանը:
Արմենուհի Մխոյան
