Հանրային հեռուստաընկերությունը բյուջե չի վճարի շուրջ 743.000 դոլար շահութաբաժինը
Կառավարությունն այսօր չզեկուցվող հարցերից մեկով հաստատեց Հանրային հեռարձակողի խորհրդի նախագահի առաջարկությունը, որով Հանրային հեռուստաընկերությունն ազատվեց 2022թ. պետական բյուջե վճարման ենթակա 308 միլիոն 664 հազար դրամի չափով շահութաբաժնի վճարման պարտավորությունից (շուրջ 743 հազար դոլար):
Նախագիծը մշակել և կառավարության հաստատմանն էր ներկայացրել Ֆինանսների նախարար Տիգրան Խաչատրյանը: Ըստ հիմնավորման՝ նպատակը տաղավարների տեխնիկական վերազինման ու դեկորացիաների ձեռքբերման անհրաժեշտությունն է:
Նախագծում նշվում է, որ 2021 թվականի հունիսին ընկերության լրատվական ծառայության բազայի հիման վրա ստեղծվել է նոր լրատվական հեռուստաալիք, որը 24-ժամյա ռեժիմով ապահովում է լրատվության մատուցում, և մրցակցային հարաբերություններին դիմակայելու նպատակով՝ կարևոր են նաև տեղեկատվության ներկայացման հեռուստատեսային տեսապատկերի արդիականությունն ու հեռուստատեսային «գրավչությունը»:
«Եթե հաշվի առնենք, որ ներկայումս լրատվական ալիքի լրատվական թողարկումների տաղավարային նկարահանումներն իրականացվում են նախկին լրատվական ծառայության թողարկումների համար մոտ 6 տարի առաջ իրականացված դեկորատիվ ձևավորմամբ, ապա պարզ է դառնում, թե որքան անհրաժեշտ է թարմացնել և ամբողջությամբ փոփոխել տաղավարի ձևավորումը։
Հատկանշական է, որ բացի լրատվական թողարկումներից, Առաջին լրատվական հեռուստաալիքի (զուգահեռ՝ նաև Առաջին ալիքի) համար պատրաստվում են հասարակական և քաղաքական բնույթի հաղորդումներ՝ «Հարցազրույց Պետրոս Ղազարյանի հետ», «Հանրային քննարկում», «Հարցազրույց Աստղիկ Սարգսյանի հետ», «Տարբեր կարծիքներ Աննա Դանիելյանի հետ» և այլն, որոնց նկարահանումները նույնպես իրականացվում են 2018 թվականին ձեռք բերված դեկորացիաներով ձևավորված տաղավարներում։ Ուստի նշված հաղորդաշարերի արդիականության շարունակականության ու դիտելիության ապահովման համար տաղավարներն անհրաժեշտ է արդիականացնել՝ փոփոխել դեկորացիաները և ներկայացնել տեխնիկական նոր լուծումներ»,- ասված է նախագծի հիմնավորման մեջ:
Այս ամենը ինչ-որ տեղ ընկալելի կլիներ, եթե ընդամենը մեկ տարի առաջ՝ 2021 թ. ապրիլի 15-ին, կառավարության 570-Ն որոշմամբ՝ հանրային հեռարձակողի խորհրդին պահուստային ֆոնդից 427 միլիոն դրամ՝ շուրջ կես միլիարդ դրամ չհատկացվեր «Հայաստանի հանրային հեռուստաընկերություն» ՓԲ ընկերության լրատվական հեռուստաալիքի ստեղծման նպատակով:
Ասել է թե՝ պաշտոնական նոր հիմնավորումը հիմնավոր չէ:
Ի դեպ, տեղեկացնենք նաև, որ «նոր լրատվական հեռուստաալիքը» ընդամենն օրեր առաջ հրապարակավ տեղեկացրել էր, որ ծանուցում է ստացել հանրային մուլտիպլեքսի մայրաքաղաքային սփռումից դադարեցնել հեռարձակումը, և, որ լրատվական ալիքին քաղաքացիները կարող են հետևել մալուխային եղանակով, 1lurer.am կայքի ուղիղ հեռարձակման բաժնում, YouTube-յան ալիքում և այլ սոցհարթակներում:
