Վրիպա՞կ, ինքնապաշտպանական բնա՞զդ, թե՞ ենթագիտակցության մեսիջ. ինչպե՞ս և ինչո՞ւ սխալվեցին «Արարատնյուզում»
Այսօր Մոսկվայում մեկնարկել է ՀԱՊԿ գագաթնաժողովը, որի շրջանակում Հավաքական անվտանգության պետությունների կազմակերպության (ՀԱՊԿ) առաջնորդները հանդես են եկել հայտարարությամբ:
Բնականաբար, այդ հանդիպման մասին հրապարակումները տեղ են գտել հայաստանյան բոլոր ԶԼՄ-ներում, սակայն միայն մեկն է հայտնվել ծիծաղելի վիճակում:
Ազգային ժողովի (ԱԺ) կառավարող խմբակցության պատգամավոր, գործարար Խաչատուր Սուքիասյանի ու ԱԺ նախագահ Ալեն Սիմոնյանի հետ ասոցիացվող կայքը՝ araratnews.am-ը, հանդիպման մասին նյութը տեղադրել էր ՀՀ 3-րդ նախագահ Սերժ Սարգսյանի լուսանկարով:
ՀԱՊԿ ղեկավարների վերջին 4 տարիների հանդիպումների տասնյակ լուսանկարներից նշված կայքում տեղ էր գտել Սերժ Սարգսյանի նախագահության տարիներին ՀԱՊԿ գագաթնաժողովից լուսանկար:
Հրապարակումը հետո, իհարկե, հեռացվել էր: Այժմ ստորև բերած հղումով նյութ կայքում առկա չէ:
Վրիպա՞կ է սա, թե՞ ինքնապաշտպանական բնազդ կամ ենթագիտակցության արտացոլանք, կիմանան միայն խոշոր գործարար պատգամավորի ու ԱԺ նախագահի անունների հետ ասոցացվող կայքում:
