«Իշխանությունը փորձում է սադրել բախումներ հրահրել, ժողովրդի մի մասին մյուս մասի դեմ հանել». Արսեն Ջուլֆալակյան

«Պրեսսինգ» հաղորդաշարում Սաթիկ Սեյրանյանի հյուրն Աշխարհի և Եվրոպայի ըմբշամարտի չեմպիոն, պատմական գիտությունների թեկնածու, ԱԺ «Իմ քայլը» խմբակցության նախկին պատգամավոր Արսեն Ջուլֆալակյանն է:

Բանախոսը նշել է.

Իշխանությունը փորձում է սադրել բախումներ հրահրել, ժողովրդի մի մասին մյուս մասի դեմ հանել:
Մարդիկ, որոնք այսօր որոշումներ են կայացնում, ատում են այն ամենը, ինչ հայկական է:
Էս մարդը բոլորին խաբելով, խոստումներ տալով՝ իր ձևով փորձում է պահել իշխանությունը:
Բոլորին՝ աշխարհաքաղաքական կենտրոններին, փորձում է բավարարել, բայց գալու է պահը, որ էս մարդը թակարդն է ընկնելու ու կործանվելու է:
Ապացուցված է, Փաշինյանը Թուրքիայի և Ադրբեջանի համար ձեռնտու թեկնածու է:
Մենք պետք է հավաքվենք, արտաքին ուժերին տեղ հասցնենք, որ Հայաստանում կա կրիտիկական զանգված, որը դեմ է այս վարչախմբին, ունենք այլընտրանք, իսկ այս իշխանությունը չունի հասարակական աջակցություն:
Երբ հավաքվի մարդկանց կրիտիկական զանգված, Նիկոլին չի հաջողվի արյուն թափել:
Իշխող քաղաքական ուժն անցել է բարոյականության սահմանները:
Ինձ ևս խաբել են, հայտարարել եմ հարթակից: 2018-ին միացել եմ նրանց՝ հենց իրենց խնդրանք-կոչով՝ Արայիկ Հարությունյանը, Արարատ Միրզոյանը, Լենա Նազարյանն ասում էին՝ ճակատագրական պահ է երկրի համար, միացիր մեզ և կրիր պատասխանատվության քո բաժինը: Թասիբի գցեցին, հայրենասիրության, սպորտի խնդիրներով մտահոգության հարցերը օրինակ բերելով, հավատացի՝ միացա, համաձայնելուց 2-3 ամիս հետո աստիճանաբար սկսեցի հասկանալ, որ խաբում են: 2020 թվականի ապրիլից արդեն հասկացա, որ ամեն ինչ նախապես մշակված էր:
Սկզբում խմբակցության ներսում անարխիա էր, ով ինչ ուզեր՝ կարող էր խոսել. չկար կառավարում, չկար հարգանք միմյանց նկատմամբ, իրենց պատկերացմամբ՝ դա էր ժողովրդավարությունը:
Փաշինյանը պրոֆեսիոնալ ձևով մանիպուլյացնում էր բոլորին, անուղղակիորեն պարտադրում իր տեսակետը, իսկական բռնատիրություն էր:
Խմբակցությունը բաժանված էր խմբերի՝ ազգայնականներ, գլոբալիստներ, թիմի ներսում խմբերն իրար դեմ էին պայքարում, միմյանց դեմ կոմպրոմատներ հավաքում:
Փաշինյանը կոմպրոմատներ ունի թիմի անդամների դեմ՝ և՛ սեռական բնույթի, և՛ ընդհանուր ֆինանսական բնույթի շահերով պայմանավորված, որոնց միջոցով վախեցնելով՝ նրանց կառավարում է:
Ակնհայտ երևում է, թե ինչ է կատարվում, օրինակ՝ Կենտրոնի արգելված վայրերում կառուցվող բարձրահարկ շենքերի շինարարության թույլտվությունները հո սիրուն աչքերի համա՞ր չէին տալիս… Իսկ երբ Փաշինյանին ուղիղ հարց էինք տալիս, պատասխանում էր. «Դուք ներդրում ուզո՞ւմ եք…»: Իսկ նախկինում նա ինչպե՞ս էր արտահայտվում հողահատկացումների ու շինթույլտվությունների դեմ…
Ասֆալտապատում՝ գումար աշխատելու ամենաձեռնտու միջոցը, պրոֆեսիոնալ կոռուպցիոն մեթոդ՝ ասֆալտապատում են փողոցը, որը մեկ սեզոն անց քանդվում է…
Սպորտի ոլորտում բազմաթիվ խնդիրներ կան այսօր, որոնք բարձրացրել եմ դեռևս 2 տարի առաջ, երբ պատգամավոր էի:
ԵՊՀ հոգաբարձուների խորհրդի ընտրությունների ամբողջությամբ կեղծված կարգ, այս բոլոր խնդիրները բարձրացրել եմ մինչև 2020 թվականի սեպտեմբերը՝ մինչև իմ հրաժարականը: Այսօր, երբ երկիրը կործանվում է, այն, ինչ անում են տարբեր բնագավառներում՝ ինձ արդեն քիչ է հետաքրքրում:
Փաշինյանը կփորձի արյուն թափել հանուն իր աթոռի, նա ապացուցված ստախոս է, ասել եմ, հաստատում եմ, և այսօր ինքն ու իր քաղաքական թիմը կարմիր գծեր են հատել, հայրենիքն են կործանել, երկրի տարածքն են փոքրացրել: Պաշտոնական տվյալներով 4000 զոհի ու 10.000 վիրավորի մեղավորն է Փաշինյանը և դա խոստովանեց վերջերս խորհրդարանում:
2020-ի սեպտեմբերի 6-ին կամ 7-ին ուղիղ հարց տվեցինք Փաշինյանին՝ «Հնարավո՞ր է պատերազմ լինի, ասաց՝ էնքան է հնարավոր, ինչքան վերջին 25 տարվա ընթացքում»: Այնինչ զինվորականները և ինքը սեպտեմբերի սկզբից իմացել են պատերազմի մասին: