Ելիսեյան պալատում տեղի կունենա Մակրոնի երդմնակալության արարողությունը
Ելիսեյան պալատում մայիսի 7-ին, Ֆրանսիայի ժամանակով՝ 11:00-ին, տեղի կունենա նախագահի պաշտոնում վերընտրված Էմանուել Մակրոնի երդմնակալության արարողությունը:
Երդմնակալության արարողությունը տեղի կունենա 450 հյուրի ներկայությամբ, որոնց շարքում են նախկին նախագահներ Ֆրանսուա Օլանդն ու Նիկոլյա Սարկոզին:
Արարողության մեկնարկին Սահմանադրական խորհրդի նախագահը կհայտարարի ընտրությունների վերջնական արդյունքները, համաձայն որի՝ ընտրությունների երկրորդ փուլում Մակրոնը ստացել է ձայների 58.55 տոկոսը, իսկ նրա հակառակորդ Մարին Լե Պենը՝ 41.45 տոկոսը: Դրանից հետո Պատվո լեգեոնի շքանշանի մեծ կանցլերը Մակրոնին կհանձնի պետական բարձրագույն իշխանության խորհրդանիշի՝ շքանշանի գրոսմայստերի շղթան, ինչից հետո Ֆրանսիայի նախագահը հյուրերի առաջ հանդես կգա ելույթով:
Արարողության եզրափակիչ հատվածում Ելիսեյան պալատում գերագույն հրամանատարին ռազմական պատիվ կտրվի, այգում կհնչի հիմնը և հրետանային ողջույնի 21 համազարկ, որի ավարտին երկրի ղեկավարը կնայի պատվո պահակախմբի շքերթը:
