«ԱՄՆ-ը պաշտպանում է խոսքի ազատությունը և խաղաղ ցույցեր անցկացնելու իրավունքը և հորդորում է կողմերին պահպանել խաղաղությունը». ԱՄՆ դեսպանատունը՝ անհնազանդության գործողությունների մասին
Նախօրեից ընդդիմադիր մի շարք ուժերի փողոցային խաղաղ անհնազանդության քաղաքացիական գործողությունների ընթացքում ՀՀ ոստիկանության ծառայողները ցուցարարների նկատմամբ անհամաչափ ուժ են կիրառում: Դրանց հետևանքով որոշ ցուցարարներ նույնիսկ մարմնական վնասվածքներ են ստացել:
Երեկ կեսօրին ՀՀ-ում ԱՄՆ դեսպանատուն գրավոր տարբերակով երկու հարց ուղղեցինք երևանյան փողոցներում արձանագրվող մարդու իրավունքների խախտումների վերաբերյալ, հաշվի առնելով նաև ՀՀ-ում ԱՄՆ դեսպանին ու ՀՀ-ում ԵՄ պատվիրակության ղեկավարին ուղղվող կոչերը՝ արձագանքել իրավիճակին և գնահատական տալ ՀՀ ոստիկանության գործողություններին:
«Ապրիլի 16-ին Նիկոլ Փաշինյանի, ՀՀ ոստիկանության պետ Վահե Ղազարյանի, ՀՀ-ում ԵՄ պատվիրակության ղեկավար Անդրեա Վիկտորինի, ՊԵԿ նախագահ Ռուստամ Բադասյանի, Մարդու իրավունքների պաշտպան Քրիստիննե Գրիգորյանի հետ միասին ՀՀ-ում ԱՄՆ դեսպան Լին Թրեյսին մասնակցել էր Հայաստանի Հանրապետության Ոստիկանության պարեկային ծառայության մեկնարկին նվիրված տոնական արարողությանը։ Դեսպան Թրեյսին իր հրապարակային ելույթներում ժամանակ առ ժամանակ անդրադառնում է Ոստիկանության բարեփոխումներին: Կխնդրեինք, որպես ՀՀ-ում ԱՄՆ դեսպան՝ Թրեյսին գնահատեր այսօր ընդդիմության խաղաղ անհնազանդության ակցիայի մասնակիցների նկատմամբ Ոստիկանության կիրառած ուժի համարժեքությունը: Արդյո՞ք տեսանյութերում երևացող վարվելակերպը համապատասխանում է բարեփոխված ոստիկանության չափանիշներին: Տրամադրել ենք երկու դրվագի տեսանյութ, սակայն նմանատիպ տեսանյութերն այսօր բազմաթիվ են եղել»,- նշել էինք մեր առաջին հարցում:
Լին Թրեյսիին ուղղված երկրորդ հարցը երեկ փողոցներում դիմակավորված անձանց բիրտ գործողությունների մասին էր:
«Այսօր առավոտվանից ընդդիմության կողմից նախաձեռնած բողոքի ակցիաները ճնշելու համար ոստիկանությունն աննախադեպ ուժեր էր մոբիլիզացրել: Կորյուն-Հերացի փողոցների հատվածը բացելու համար ակցիայի վայր խուժեցին սև դիմակներով կասկածելի անձինք: Ոստիկանության կողմից վատ վերաբերմունքը կանխելուն ուղղված միջազգային կանոն է՝ ոստիկանները պետք է լինեն համազգեստով, իսկ նրանց համազգեստին պետք է հստակ տեսանելի լինեն անհատականացնող տվյալներ՝ առնվազն անունը և ազգանունը պարտադիր նշելով: Ընդ որում, պետք է լինի այնպես, որ քաղաքացին կարողանա ճանաչել կամ նույնականացնել իրեն մոտեցած կամ իրեն բերման ենթարկող Ոստիկանության ծառայողին: 168.am-ը ոստիկանությունից փորձել է ճշտել՝ արդյո՞ք սև համազգեստով, սև դիմակներով անձանց խումբը կապ ուներ ոստիկանության հետ, և եթե ուներ, ո՞ր ստորաբաժանումն էին ներկայացնում վերջիններս, սակայն ոստիկանության լրատվականից չմեկնաբանեցին: Ինչպե՞ս կգնահատեք այս փաստը, որը ևս կա տեսանյութերում»,- այսպես էինք ձևակերպել մեր հաջորդ հարցը:
ՀՀ-ում ԱՄՆ դեսպանատնից 168.am-ի ուղղած երկու հարցերին պատասխանները ներկայացնում ենք ամբողջությամբ․
«Մենք ուշադիր հետևում ենք ընթացող ցույցերին։ Միացյալ Նահանգները պաշտպանում է խոսքի ազատությունը և խաղաղ ցույցեր անցկացնելու իրավունքը և հորդորում է կողմերին պահպանել խաղաղությունը և հարգանք դրսևորել իրավունքի գերակայության և Հայաստանի ժողովրդավարության հանդեպ»:
Հիշեցնենք, որ ՀՀ-ում ԱՄՆ դեսպան Լին Թրեյսին այս օրերին ՀՀ ԱԳ նախարար Արարատ Միրզոյանի հետ ԱՄՆ-ում է, որտեղ վերջինս հանդիպում է ունեցել ԱՄՆ Միջազգային զարգացման գործակալության (USAID) կառավարիչ Սամանթա Փաուերի, ԱՄՆ պետքարտուղարի քաղաքական հարցերով տեղակալ Վիկտորիա Նուլանդի, ԱՄՆ պետքարտուղար Էնթոնի Բլինքենի հետ։
