«Մնացած տարածքներում քամի՞ էին քշում, թե՞ փուչիկ էին տրաքացնում». Տիրան Խաչատրյանը` Նիկոլ Փաշինյանին
ՀՀ ԶՈՒ ԳՇ պետի նախկին տեղակալ Տիրան Խաչատրյանը Ազատության հրապարակում լրագրողների հետ զրույցում անդրադարձել է Նիկոլ Փաշինյանի հայտարարությանը` կապված Արցախի կարգավիճակի նշաձողի իջեցման հետ:
«Նշաձողի իջեցման հետ կապված խիստ բացասական է իմ մոտեցումը: Ես չեմ պատկերացնում` ինչ է նշանակում նշաձող իջեցնել ասվածը: Այդ ինչ պահանջ է ապահովել, կամ ինչ պահանջ է տրվել, որն է բավարարվել, որ մեզ ասում են` դե ձեր պահանջներն էլ ինչ-որ չափով իջեցրեք: Կամ` ով է ասել: Կա՞ ինչ-որ հավաստող, ապացուցող մարդ, երևույթ, փաստաթուղթ, որ էդպիսի բան է եղել: Իմ կարծիքով, դա ընդամենը էլի իր ֆանտազիան, երևակայությունները կյանքի կոչելու կամ մարդկանցով խաղալու ձևերից մեկն է»,-նշել է գեներալը:
Ինչ վերաբերում է բանակ չունենալու մասին տարբեր անձանց հայտարարություններին, Տիրան Խաչատրյանը ասել է` ոչ մեկը չի կարող ասել, որ մենք բանակ չենք ունեցել:
«Եթե բանակ չենք ունեցել էսքան տարիներ անվտանգությունից սկսած վերջացրած տարբեր միջազգային միջոցառումներին մասնակցությունից էդ ովքեր էին զբաղվում: Ինչպես էին անունը, հեղինակությունը պահում»,-նկատել է ԳՇ պետի նախկին տեղակալը:
Անդրադառնալով պատերազմի ժամանակ զրահաբաճկոն լինել-չլինելու մասին Նիկոլ Փաշինյանի, Դավիթ Տոնոյանի Մովսես Հակոբյանի հայտարարություններին, Տիրան Խաչատրյանը նշել է, որ չի ցանկանում նրանց ասածներին հակասել, բայց շեշտել է` բոլորն էլ ճիշտ չեն ասել:
«Ո’չ Նիկոլ Փաշինյանը, ո’չ Դավիթ Տոնոյանը, նույնիսկ` Մովսես Հակոբյանը»,-ընդգծել է Խաչատրյանը:
Հարցին` իրեն պատասխանատու չի՞ զգում այսօրվա իրավիճակի համար, քանի որ ժամանակին ռազմական դրության պայմաններում կարող էին հեռացնել Նիկոլ Փաշինյանին, ինչու չկարողացան հասնել դրան, գեներալը հարցին հարցով է պատասխանել` իսկ մենք ինչ էինք պահանջել:
«Մենք պահանջում էինք, որ էն քաղաքականությունը, որը տանում են, ազգակործան է, դրա շարունակությունը բերելու է էս օրվան: Մենք դա հայտարարեցինք և պահանջեցինք հեռանան: Ուրիշ բա՞ն ենք պահանջել: Դուք ոնց եք պատկերացնում` ռազմական հեղաշրջու՞մ պիտի լիներ: Էդ պատասխանատվությունը դուք էդպե՞ս եք պատկերացնում: Եվ այդ ռազմական հեղաշրջման արդյունքում, հետևանքով ինչ կլիներ, ով էր դրա պատասխանատվությունը կրելու:
Համաշխարհային, միջազգային հանրությունը ոնց էր վերաբերվելու դրան: Եթե լիներ ռազմական հեղաշրջում այդ ներքին բախումները և այլն, ինչ էր ստացվելու: Այսինքն, մենք երկրի անվտանգությունը ապահովելու փոխարեն, ավելի ներսից քանդելու խնդիրնե՞ր էինք ստեղծելու»,-շեշտել է ԳՇ նախկին պաշտոնյան` հավելելով, որ իրենց քայլը քաղաքական չէր, մեղադրողները թող ապացուցեն, ինչ-որ բացատրություն տան, թե դրա քաղաքական լինելն ինչով է հիմնավորված:
«Օդով, չգիտեմ ինչով, իրենց դատարկ ցնորաբանություններից վերցնել ու ասել` էդպես է: Եթե քաղաքականության մեջ մտնել լիներ, մենք վաղուց կալանավորված կլինեինք»,-ասել է Խաչատրյանը:
Ինչ վերաբերում է Նիկոլ Փաշինյանի հայտարարությանը, թե պատերազմը եղել է Շուշիի համար, գեներալը հարցադրում է արել` մնացած տարածքների համար չի՞ եղել:
«Մնացած տարածքներում քամի՞ էին քշում, թե՞ փուչիկ էին տրաքացնում: Վերցնում եք ինչ-որ կտոր, կամ իր ասածները` հիմք: Այդ դեպքում պատերազմը որտեղից է սկսվել, Շուշիին հասնելու շատ ավելի կարճ ուղիներ կային: Արդյո՞ք էդպես է, իհարկե` ոչ»,-ասել է գեներալը:
Լրագրողները հիշատակել են նաև պատերազմը կանխելու մասին Փաշինյանը հայտարարությունը և հարցրել` ինչպես էր դա հնարավոր, Տիրան Խաչատրյանը առաջարկել է Փաշինյանին հարցնել:
Միաժամանակ նա նշել է, որ դրանք դիվանագիտական խնդիրներ են, այսինքն, Փաշինյանը կարող էր կանգնեցնել ու չի արել դա:
«Ասեց չէ՞ կարող էի կանգնեցնել: Իրեն հարցրեք` ինչի չկանգնեցրեց»,-հավելել է գեներալը:
Ինչ վերաբերում է վերջին պատերազմում հաղթելու հնարավորությանը, գեներալը նշել է, որ չի կարծում, թե կաղթեինք, թե հնարավորությունները մեծ էին հակառակորդի եղած ուժերի պայմաններում, անհամաչափ պայքարում, այլ հարց է` որ արդյունքը այլ կլիներ:
Տիրան Խաչատրյանը ասել է, որ այսօր էլ պատերազմի վտանգ կա: Ինչ վերաբերում է բանակի` դրան դիմագրավելու կարողությանը, նա շեշտել է` հետպատերազմյան շրջանում որտեղ եղել է ուժերի կենտրոնացում, ասել, որ մեր զորքերը մեծ կորուստներ են ունեցել, այդպես չի: Այսինքն, որտեղ խնդիր է դրված եղել, կարողացել են իրականացնել` կորուստներ պատճառելով հակառակորդին:
«Այն, որ խաղաղության պայմանագրի այլընտրանքը պատերազմն է, դա ուղղակի հանրությանը, ժողովրդին, հատկապես իր համակիրներին խաբելու համար է ասվում: Ես չեմ ասում, որ հիմա ի վիճակի ենք լայնամասշտաբ կամ գերտերությունների, հզոր ուժերի հետ պատերազմի մեջ մտնել, բայց միանշանակ համոզված եմ` առանձին ուղղություններով որոշակի խնդիրներ լուծելու հնարավորություն, կարողություն ունենք: Բանակ ասելով չպետք է դիտարկենք միայն հրամանատար, այլ հրամանատար-սպառազինություն- կառուցվածք-տեխնիկա ամբողջականության մեջ պիտի դիտարկել»,-ընդգծել է Տիրան Խաչատրյանը:
Ի դեպ, նա նշել է` ԱԽ համապատասխան նիստին չի եղել, բայց հավատում է` ԳՇ նախկին պետ Օնիկ Գասպարյանին, որ պատերազմի 4-րդ օրը առաջարկել է կանգնեցնել մարտական գործողությունները:
