Ովքե՞ր են պատասխանատու լինելու դեղերի որակի և անվտանգության համար, այսպես ասած, ֆարմակովիջիլանսի. Առաջինը՝ Հայաստան նախաձեռնության Բժշկական խորհուրդ
Վերջերս շրջանառության մեջ են հայտնվել մեծ քանակությամբ չգրանցված դեղեր։ Այս հանգամանքը լի է հանրային առողջության համար բազմաթիվ ռիսկերով։
Խնդիր է առաջանում դեղի ծագման, փոխադրման պայմանների և մի շարք այլ հարցերի վերաբերյալ։ Այս փաստերը խոչընդոտում են պացիենտի առողջության վրա հնարավոր բացասական ազդեցության գնահատմանը։
Առկա իրավիճակը խնդրահարույց է նաև դեղագործական շուկայի համար։
Անորոշությունը հանգեցնելու է մի խումբ հարցերի։ Մասնավորապես՝
1. Ովքե՞ր են պատասխանատու լինելու դեղերի որակի և անվտանգության համար, այսպես ասած, ֆարմակովիջիլանսի։
2. Ինչպե՞ս է գոյատևելու տեղական արտադրողը։
3. Ինչպե՞ս են շարունակելու աշխատել միջազգային ֆիրմաների ներկայացուցչությունները։
Այս հարցերը չեն կարող առաջնահերթություններից դուրս մղվել։ Վարվող ողջ քաղաքականությունը պետք է տա վերոգրյալ հարցերի պատասխանները։
Նորարարություններ ներդնելուց առաջ պետք է ունենալ հստակ չափիչներ և դրանց գործունակ լինելու հիմնավորումներ։ Անթույլատրելի է տարիներով հիմնված աշխատող համակարգը քանդել՝ վտանգի տակ դնելով քաղաքացիների անվտանգությունը և վստահությունը։
Օրենսդրական փոփոխությունների և դաշտը կարգավորելու նպատակ հետապնդող բոլոր որոշումները լինելու են մեր ուշադրության կենտրոնում, ենթարկվելու են մասնագիտական ուսումնասիրության և վերլուծության՝ հանրայնացվելու նպատակով։
Առաջինը՝ Հայաստան նախաձեռնության Բժշկական խորհուրդ
