Որո՞նք էին Սերժ Սարգսյանի հարցազրույցի հիմնական ուղերձները
Քաղտեխնոլոգ Վիգեն Հակոբյանի կարծիքով՝ ՀՀ երրորդ նախագահ Սերժ Սարգսյանի հարցազրույցի գլխավոր ուղերձն այն էր, որ հանրության այն հատվածը, որը համարում է, որ Արցախը հայկական է, պետք է կոնսոլիդացվի և փորձի երկրի այսօրվա իշխանությունների քաղաքական կուրսը փոխի, դնի այն ծիրի մեջ, որ Արցախը երբեք չի կարող լինել Ադրբեջանի մաս:
ՀՀ երրորդ նախագահ Սերժ Սարգսյանն արցախյան բանակցային գործընթացի վերաբերյալ հարցազրույցի ընթացքում ընդգծեց՝ եկել է, որպեսզի նորից հայտարարի՝ Արցախը երբեք չի լինելու Ադրբեջանի կազմում: Երրորդ նախագահը վստահ է, որ չնայած կործանարար պատերազմին, չնայած կապիտուլյացիային, դրա համար դեռևս կան հնարավորություններ:
Վիգեն Հակոբյանն ընդգծեց. «Ամենացավալին այն է, որ ընդամենը 2-3 տարի առաջ նույնիսկ այդ արտահայտությունը չէր կարող լինել, այսինքն՝ հանրության այն մասը, որը համարում է Արցախը հայկական. Հիմա այնպիսի վիճակի ենք հասել, որ արդեն հանրությանը բաժանում ենք այն մասի, որն Արցախը համարում է հայկական, և հանրության այն մասը, որը վաղուց Արցախը համարում է ոչ հայկական՝ երկրի ղեկավարության գլխավորությամբ»:
Վիգեն Հակոբյանի գնահատմամբ՝ հաջորդ գլխավոր մեսիջն այն էր, որ, այնուամենայնիվ, Նիկոլ Փաշինյանի վերջին ասուլիսներում բերված փաստարկները, որոնց գլխավոր նպատակն էր՝ հանրությանը համոզել, որ ծանր ժառանգություն է ստացել, և անխուսափելի էր պարտությունը, Սերժ Սարգսյանը փորձեց ժամանակագրական եղանակով ապացուցել, որ ժառանգությունն այնքան ծանր չէր, ինչպես ներկայացվում է:
«Այս երկու հիմնական մեսիջն էր, այսինքն՝ Սերժ Սարգսյանը փորձեց ցույց տալ, որ ժառանգությունը մինիմում կրիտիկական չէր, որպեսզի դա բերեր պատերազմի պարտությանը և կապիտուլյացիային, երկրորդ՝ շանս կա կոնսոլիդացիայի միջոցով, առողջ ուժերի միջոցով, Արցախը հայկական համարողների միջոցով փորձել կոնսոլիդացվել և ստիպել այսօրվա իշխանություններին՝ իրենց քաղաքական կուրսը փոխել: Դրանից բխում է նաև այն ակնարկը, որ, եթե դա չի հաջողվում, ապա ճանապարհը մեկն է մնում՝ փոխել իշխանությանը»:
