«Չերեզ սովխոզ կարողանում ենք հասնել Գորիս-Կապան». Դավիթ Բեկի վարչական ղեկավար
Սյունիքի մարզի Դավիթ Բեկ գյուղը, ինչպես Սյունիքի մարզի այլ համայնքներ ու գյուղեր, տևական ժամանակ է՝ օգտվում է այլընտրանքային ճանապարհից։
«Չերեզ սովխոզով՝ Սյունիք-սովխոզ, կարողանում ենք հասնել Գորիս-Կապան։ Տարբեր ճանապարհներով են գնում-գալիս բնակիչները, չեմ կարող ասել»,- 168.am–ի հետ զրույցում նշեց Դավիթ Բեկ գյուղի վարչական ղեկավար Բենիամին Պողոսյանը՝ ընդգծելով, որ այս ընթացքում գյուղի ուղղությամբ թշնամին սադրանքի չի դիմել։
Ինչ վերաբերում է իր այն հայտարարությանը, որ թշնամին ցանկանում է մաքսակետ տեղադրել նաև Կարմրաքարի մոտ, դեպի Շուռնուխ տանող հատվածում, Բենիամին Պողոսյանն ասաց. «Ես նման բան չեմ ասել, դրանք իրականությանը չեն համապատասխանում»։
Հիշեցնենք, որ նոյեմբերի 10-ին ՀՀ Անվտանգության խորհրդի քարտուղար Արմեն Գրիգորյանը Հանրայինի եթերում հայտարարել էր, որ այդ օրը՝ գիշերը 12-ից սկսած, Գորիս-Կապան ճանապարհի հատվածում ադրբեջանական կողմը կիրականացնի սահմանային և մաքսային հսկողության գործառույթ՝ մաքսակետեր կտեղադրի։ Այս հայտարարության հաջորդ օրն էլ ԱԽ քարտուղարը հայտնեց, որ ըստ իր տրամաբանության, ՀՀ քաղաքացիներն այդ ճանապարհով անցնելիս պետք է որոշակի գումար վճարեն ադրբեջանական կողմին։ Օրեր անց թշնամին մաքսակետ տեղադրեց նաև Կապան-Ճակատեն հատվածում, որի արդյունքում բազմաթիվ գյուղեր այսօր չեն կարողանում օգտվել հիմնական ճանապարհից։
Հիշեցնենք նաև, որ նոյեմբերի 16-ին թշնամին Սյունիքի մարզի Սիսիանի հատվածում դիմել էր ռազմական ագրեսիայի, որի հետևանքով հայկական կողմն ունի զոհեր, անհետ կորածներ և գերեվարվածներ, պատկան մարմինները, սակայն, կոնկրետ թիվ չեն նշում։ Թշնամին սադրանքների է դիմել նաև Գեղարքունիքի և Տավուշի մարզերի դիրքերի ուղղությամբ։
