Հակաթալիբյան ճակատը հայտարարել է Քաբուլի նահանգում պայքար սկսելու մասին
Զինված խմբավորումը Աֆղանստանի Քաբուլի նահանգում հայտարարել է Ազգային դիմակայության ճակատին (ԱԴՃ) աջակցելու եւ «Թալիբան» շարժման զինյալների դեմ իր պայքարն սկսելու մասին։
Տեսաուղերձում, որը նոյեմբերի 9-ին հրապարակվել է սոցցանցերի աֆղանական սեգմենտում, ասվում է, որ զինված խմբավորումն աջակցում է ԱԴՃ-ին՝ Ահմադ Մասուդի գլխավորությամբ, եւ պատրաստ է պայքարել «Թալիբան»-ի զինյալների դեմ: Նախօրյակին ԱԴՃ-ին իր աջակցության մասին է հայտարարել Աֆղանստանի Թահարի հյուսիսարեւելյան նահանգի զինված խմբավորումը:
«Թալիբան» շարժման զինյալներն օգոստոսին Աֆղանստանում ԱՄՆ-ի եւ ՆԱՏՕ-ի զորքերի դուրսբերման ֆոնին գործնականում առանց մարտի գրավել են երկրի գրեթե բոլոր նահանգները: Օգոստոսի տասնհինգին արմատականները մտել են մայրաքաղաք, ինչից հետո այնտեղից փախել են նախագահ Աշրաֆ Ղանին եւ նրա կաբինետի անդամները: Օգոստոսի լույս 16-ի գիշերը «Թալիբան»-ի քաղաքական գրասենյակի պաշտոնական ներկայացուցիչ Մուհամադ Նայիմը հայտարարել է, որ պատերազմն Աֆղանստանում վերջացել է, եւ պետության կառավարման ձեւը պարզ կդառնա մոտ ժամանակներս:
Լույս օգոստոսի 31-ի գիշերը ԱՄՆ-ի զինվորականները լքել են Քաբուլի օդանավակայանը՝ վերջ դնելով ամերիկյան գրեթե 20-ամյա ռազմական ներկայությանը Աֆղանստանում: Սեպտեմբերի 6-ին թալիբները հայտարարել են, որ Փանջշերն աֆղանական 34 նահանգներից վերջինն է, որը մարտերից հետո անցավ իրենց հսկողության ներքո, եւ երեք շաբաթվա ընթացքում երկրորդ անգամ հայտարարեցին պատերազմի ավարտ
