Ղրղզստանում աղքատների բաժինը հասել է 31 տոկոսի

Ղրղզստանի այն քաղաքացիների բաժինը, որոնց եկամուտները գտնվում են աղքատության մակարդակից ցած, համավարակն սկսվելուց հետո 20 տոկոսից ավելացել է մինչեւ 31 տոկոս, իսկ երկրում զբոսաշրջության ճյուղի շրջանառությունն այդ նույն ժամանակահատվածում կրճատվել է 80 տոկոսով: Այդ մասին հայտնել է Ղրղզստանի էկոնոմիկայի եւ առեւտրի նախարար Դանիյար Ամանգելդիեւը, նոյեմբերի 5-ին հաղորդել է «Վեստի» տեղական հրատարակությունը՝ վկայակոչելով գերատեսչության մամուլի ծառայությունը։

Կորոնավիրուսային վարակի համաճարակը հանգեցրել է2020 թվականին Ղրղզստանի համախառն ներքին արդյունքի (ՀՆԱ) 8,6 տոկոսով անկման: Բարձր աշխատատարությամբ ճյուղերը տուժել են հարաբերականորեն էլ ավելի խիստ, պատմել է Ամանգելդիեւը՝ ելույթ ունենալով զարգացող երկրների առեւտրի նախարարների հանդիպմանը, երկրներ, որոնք ելք չունեն դեպի ծով, հանդիպում, որը տեղի է ունեցել Առեւտրի համաշխարհային կազմակերպության (ԱՀԿ) առաջիկա 12-րդ նախարարական խորհրդաժողովի շրջանակներում: Էկոնոմիկայի նախարարի խոսքով՝ համավարակի պատճառով Ղրղզստանում լրջորեն տուժել են առեւտուրը, տրանսպորտային եւ շինարարական հատվածները:

Գնաճը 2019 թվականի 3 տոկոսից 2020 թվականին բարձրացել է մինչեւ 10 տոկոս: Արտադրության կրճատման, բյուջեի պակասուրդի ավելացման եւ ազգայն արժույթի գնազրկման պատճառով պետական պարտքն ավելացել է ՀՆԱ-ի նկատմամբ16 տոկոսով եւ 2020 թվականին կազմել ՀՆԱ-ի 68 տոկոսը:

Ղրղզստանում աղքատության մակարդակը բարձրացել է եկամուտների նվազման եւ գործազրկության աճի պատճառով, հավելել է նախարարը: Պաշտոնական տվյալներով՝ համավարակի սկզբից Ղրղզստանում հայտնաբերվել է կորոնավիրուսով 181,7 հազար ախտահարված, նրանցից 176,2 հազարն ապաքինվել է, 2 681 մարդ մահացել է: Գարնանը երկրում, որտեղ բնակվում է 6,5 միլիոն մարդ, սկսվել է բնակչության զանգվածային պատվաստումը: Վերջին տվյալներով՝ Ղրղզստանում առաջին դեղաչափով պատաստված է ավելի քան 1,02 միլիոն մարդ, երկուսով՝ շուրջ 775,5 հազար բնակիչ, հաղորդել է ՏԱՍՍ-ը: