Ինչ կոչեր էին անում իշխանության ամենախիստ ընդդիմախոսները պատերազմի առաջին օրերին․ antifake.am

2020 թվականի սեպտեմբերի 27–ին Ադրբեջանը պատերազմ սանձազերծեց Արցախի Հանրապետության դեմ։ Չնայած այն հանգամանքին, որ 2018 թվականին իշխանության եկած Նիկոլ Փաշինյանի քաղաքական հակառակորդները և ընդդիմախոսները 2 տարի շարունակ զգուշացնում էին Արցախի հակամարտության կարգավորման հարցում իշխանության կողմից որդեգրած քաղաքականության վտանգավոր հետևանքների և պատերազմի վերահաս վտանգի մասին, այնուամենայնիվ նրա ամենածայրահեղ ընդդիմախոսներն ու քննադատները պատերազմի մեկնարկից ի վեր որդեգրեցին ներքաղաքական համերաշխություն հաստատելու և իշխանությանն ամեն կերպ աջակցելու սկզբունքը, որը պահեցին մինչև պատերազմի ավարտ։ Ընդդիմադիրներն առաջնորդվում էին և իրենք էլ իրենց հերթին կոչ էին անում առաջնորդվել պատերազմի կանոններով, այն է՝ տարածել բացառապես պաշտոնական տեղեկատվություն և լինել պետության ու բանակի կողքին։

Ոմանք կազմեցին կամավորական խմբեր և մեկնեցին ռազմաճակատ կռվելու, ոմանք լծվեցին տեղեկատվական հարթակում պայքարելու գործին, ոմանք իրենց ռեսուրսներն ու կապերը գործի դրեցին հումանիտար օգնություն հավաքագրելու և սոցիալական խնդիրները լուծելու համար։

Իշխանության ընդդիմախոսները նաև իրենց հանրային հարթակներն օգտագործեցին հանրային համերաշխության, քաղաքական պառակտությունները մի կողմ դնելու ու որպես պետություն մեկ բռունցք դառնալու կոչերի համար։

Antifake.am-ը Ներկայացնում է, թե ինչ կոչեր են արել Նիկոլ Փաշինյանի ընդդիմախոսները և ընդդիմադիր կուսակցությունները պատերազմի առաջին օրերին։

Արցախի նախկին ՄԻՊ, «Իրավական ուղի» ՀԿ համահիմնադիր, իրավապաշտպան Ռուբեն Մելիքյանն իր ֆեյսբուքյան էջում գրել է․

«Наше дело правое, враг будет разбит, победа будет за нами!!!»։

***

«Պատերազմական կանոններով.

1) միմիայն պաշտոնական տեղեկատվություն։

2) զինվորականներին չխանգարել զանգերով ու հարցուփորձով։

3) պատրաստ լինել լինել այնտեղ, որտեղ անհրաժեշտ է ու անել այն, ինչ անհրաժեշտ է։

Բոլորս մեր Զինված ուժերի կողքին ենք!!»։

***

«Ու մի բան էլ. եթե տեսնում եք, որ թշնամին անընդհատ դիմում է տեղեկատվական դիվերսիայի մեծաքանակ միջոցների (ինչպես՝ այսօր), ուրեմն նրա գործերը իրական ռազմաճակատներում լավ չեն։ Ուրեմն թշնամին ստիպված է դիմել տեղեկատվական դիվերսիաների՝ իրական ռազմաճակատում ստացած ջարդը «փոխհատուցելու» համար։

Հետևապես՝ վայրկյան անգամ չենք մոռանում տեղեկատվական պատերազմի «ոսկե կանոնը» – վստահել միմիայն հայկական պաշտոնական տեղեկատվությանը»։

«Քաղաքացիական գիտակցություն» ՀԿ նախագահ, քաղաքագետ Նարեկ Սամսոնյանն իր ֆեյսբուքյան էջում գրել է․

Կեցցե՛ հայոց փառապանծ բանակը, ուժ ու բազմապատիկ քաջություն մեր զինվորներին:

Հետևում ենք բացառապես պաշտոնական լրահոսին և առաջնորդվում պատերազմի կանոններով:

Եվ վերջում` Արցախը երբեք չի լինելու ադրբեջանի կազմում»։

***

«Համընդհանուր զորահավաքին մասնակցելը յուրաքանչյուրիս պարտքն է, այս ընթացքում ցանկացած քաղաքական տարակարծություն մի կողմ դնելու և Հայրենիքը պահելու պարտականություն ունի յուրաքանչյուր հայ:

Ես անձամբ իմ ունեցած ողջ քաղաքական/քաղաքացիական ռեսուրսն այս պահից սկսած ծառայեցնելու եմ բացառապես թշնամու ագրեսիայի ողնաշարը կոտրելու գործին:

Կեցցե՛ հայոց փառապանծ բանակը, փառք հանուն Հայաստանի և Արցախի Հանրապետությունների ազատության ընկած և դրա համար կենաց մահու կռիվ տվող հայորդիներին:

Արցախը երբեք ՉԻ՛ ԼԻՆԵԼՈւ ադրբեջանի կազմում!!!»։

***

«Այս պատերազմում կա բացառապես երկու կողմ` ՀԱՅ-ն ու թուրքը այլ կողմեր փնտրելը դավաճանություն է. և սա վստահաբար վերջին պատերազմը չէ։

«Էս պահին չկան «նախկիններ-ներկաներ-թալանչիներ-ստախոսներ-պոպուլիստներ» եզրույթները: Եթե սա չհասկանա կողմերից մեկը վաղը մյուս օրը սերունդների առաջ պատասխան է տալու: Դադարեցրեք էդ եղկելի պահելաձևը, էս պահին դրա ժամանակը չէ, վստահաբար գալու է այդ ժամանակը, բայց հիմա ճիշտ-սխալ, լավ-վատ անելու ժամանակը չի:

Էս պահին մենք ունենք մի տրիվիալ փաստ. ընդդիմությունը ի հակադրություն ապրիլյանի ժամանակվա ընդդիմադիրների ամեն հնարավոր կերպով դադարեցրել է որևէ քննադատություն գործող իշխանությունների հասցեին և սա ոչ թե դրական կամ բացասական է այլ պարզապես այդպես է կարգը: Հիմա զսպեք ձեր դեգենեռատներին, որ «սև-սպիտակ» չանեն առանց այդ էլ պատերազմի ավարտից հետո բազմաթիվ հարցերի պետք է պատասխանեք, մի ավելացրեք հարցերի քանակն ու հետևանքների ծանրությունը:

Այսօր կա մի պայքար Հայի և թուրքի, որտեղ մենք չունենք անելու այլ բան քան մեր գոյությանը խանգարող շներին շանսատակ անելը:

Փառք հայոց փառապանծ բանակին

Փառք մեր հերոս տղաներին!!!»։

«Ադեկվադ» միաբանության հիմնադիր Արթուր Դանիելյանը գրել է․

«․․․ Տարածել միայն պաշտոնական տեղեկատվություն!!!»։

***

«Հայաստանը երբեք այսքան ուժեղ չի եղել, քանի որ «ընդդիմությունում» պատերազմի կուսակցությունն է: Թուրքերը սխալվել են իրենց հաշվարկներում, էս անգամ ներսից դուռ բացող չի լինելու!»։

***

«Հայաստանը ունի իր պատմության մեջ ամենալեգիտիմ իշխանությունը և ամենառազմատենչ ու վճռական ընդդիմությունը: Արցախում տրամադրությունը մարտական է! Հաղթանակի համար մենք ունենք մեզ համար անհրաժեշտ ամեն ինչ!»։

ՀՀԿ-ական նախկին պատգամավոր, «Քառյակ մեդիայի» համահիմնադիր, վերլուծաբան Կարեն Բեքարյանն իր ֆեյսբուքյան էջում գրել է․

«Ստեփանակերտում եմ…

Ում հետ շփվում եմ` բոլորը պինդ են, ու փառք Աստծո…

Ինչով և ինչպես կարող եմ` պատրաստ եմ օգտակար լինել Արցախի Հանրապետությանը

Հանուն մեր երկու պետությունների, մեր ժողովրդի և մեր սերունդների` մենք բանակի թիկունքին միասնական չկանգնելու իրավունք չունենք»։

ՀՀԿ փոխնախագահ Արմեն Աշոտյանն իր ֆեյսբուքյան էջում հրապարակել է իր հարցազրույցը, որում մասնավորապես նշել է․

«Ոչ մի ներքին օրակարգ։

Ամեն ինչ՝ ռազմաճակատի ու Հայրենիքի համար»։

ՀՀԿ ԵԿ նախկին նախագահ Հայկ Մամիջանյանն իր ֆեյսբուքյան էջում տեղադրել էր ՀՀԿ ԵԿ հայտարարությունը, որում մասնավորապես ասվում էր․

«ՀՀԿ երիտասարդական կազմակերպության անդամները պատրաստ են իրենց ավագ ընկերների հետ զինվորագրվելու հայրենիքի պաշտպանության գործին, նույն նպատակով համագործակցելու Հայաստանի և Արցախի երիտասարդական կազմակերպությունների հետ, համատեղելու ուժերը և անելու ամեն հնարավորը` ժամ առաջ թշնամուն հերթական ջախջախիչ պարտությունը պարտադրելու համար: Հանրապետական երիտասարդներն ըստ պահանջի ներկայանում են ՀՀ ՊՆ զորակոչային եւ զորահավաքային համալրման ծառայության տարածքային ստորաբաժանումներ, տեղեկատվական ակտիվ աշխատանք իրականացնում միջազգային երիտասարդական այն կազմակերպությունների շրջանում, որոնց հետ ՀՀԿ ԵԿ-ն սերտորեն համագործակցում է»։

Քաղաքագետ Հրանտ Մելիք–Շահնազարյանն իր ֆեյսբուքյան էջում գրել է․

«Պատերազմական իրավիճակն այլևս նորություն չէ մեր հասարակության համար։ Փորձն ունենք, անելիքներն էլ գիտենք։ Բայց միևնույն է, անվտանգության կանոնների մասին պետք է անընդհատ խոսել։ Որովհետև վստահեցնում եմ, որ պատերազմները չեն սահմանափակվում միայն առաջնագծով։ Մեր դեպքում՝ առավել ևս։ Այն ավելի ընդգրկուն է և վերաբերվում է յուրաքանչյուրին առանձին վերցրած։ Դրա համար նախ և առաջ պետք է միասնական լինել։ Մի կողմ դնել քաղաքական և այլ տիպի բոլոր տարաձայնություններն ու անցնել միասնական պայքարի ռեժիմի։

Երկրորդ, հետևել բացառապես պաշտոնական տեղեկատվությանը։ Անտեսել թշնամական քարոզչությունը, նրանց մշակած թեզերը ներս չբերել ու խուճապ չտարածել։ Վստահեցնում եմ՝ այդկերպ ամենքս շատ մեծ օգուտ կտանք առաջնագծին։

Երրորդ, մի զանգեք սահմանում կանգնած ձեր ընկերներին, եղբայրներին, զավակներին։ Դա շատ վտանգավոր է։ Դուք կցանկանաք մեկ-երկու բան ավել իմանալ, բայց հիշեք, որ ձեր այդ «տեղեկացվածությունը» կարող է կյանք արժենալ։ Համեբերեք խնդրում եմ, ամեն ինչ իր ժամանակին կիմանաք։

Եվ վերջապես երրորդը։ Հավատացեք, որ մեր Բանակն ի վիճակի է հաղթել թշնամուն։ Ու հաղթելու է։ Այս հարցում որևէ կասկած չունենաք։ Ամեն ինչ լավ է լինելու»։

«Մեկ Հայաստան» կուսակցության նախագահ Արթուր Ղազինյանն իր ֆեյսբուքյան էջում գրել է․

«Սիրելի հայրենակիցներ,

Ադրբեջանական հերթական սանձարձակությանը պետք է պատասխանել համախմբվածությամբ, ամուր ոգով և տոկունությամբ:

Այսպիսի իրավիճակներում մեկ ազգ, մեկ բանակ և մեկ Հայաստան դառնալու հրամայականը պետության ամրության և անվտանգության միակ գրավականն է:

«Մեկ Հայաստան» կուսակցություն»։

Մեդիափորձագետ Տիգրան Քոչարյանն իր ֆեյսբուքյան էջում գրել է․

«Ժող, միայն ու միմիայն պաշտոնական լրահոս ու տեղեկատվություն տարածեք։

Զսպեք ձեզ»։

«Razm.info» կայքի համակարգող Կարեն Վրթանեսյանն իր ֆեյսբուքյան էջում գրել է․

«ԱՅՍՕՐ ՄԵՆՔ ԲՈԼՈՐՍ ՀԱՅԱՍՏԱՆԻ ԱՇԽԱՐՀԱԶՈՐՆ ԵՆՔ

Ես՝ որպես ընդդիմադիր, որպես իշխանությունների հետևողական ու խիստ քննադատ հիմա հայտնում եմ, որ այս պահից ներքաղաքական թեմաները մի կողմ եմ դնում։

Միշտ եղել եմ մեր բանակի կողքին, անկախ իմ քաղաքական դիրքորոշումից, այդպես էլ կշարունակեմ, ուղղակի իշխանությունների քննադատությունը դնում եմ մի կողմ որոշ ժամանակով։

Разборы полётов կլինեն այն ժամանակ, երբ թշնամուն հաղթենք։»։

«Հայրենիք» կուսակցության առաջնորդ Արթուր Վանեցյանը պատերազմի առաջին օրը հայտարարել է․

««Հայրենիք» կուսակցությունը, մի կողմ դնելով իշխանությունների հետ առկա քաղաքական բոլոր տարաձայնությունները, այս պահին ամբողջ կազմով համախմբված է հայկական բանակի, Հայաստանի և Արցախի պետությունների շուրջ և ունեցած ողջ կարողությամբ նպաստելու է հաղթանակին:

Ես կնախաձեռնեմ հավաք եւ կմեկնենք սահման, բայց հաշվի առնելով հայտարարված ռազմական դրությունը մեր բոլոր գործողությունները համաձայնեցնելու ենք ՀՀ պաշտպանության նախարարության հետ»:

ՀՀ երկրորդ նախագահ Ռոբերտ Քոչարյանը սեպտեմբերի 27–ին հայտարարություն է տարածել, որում մասնավորապես ասվում էր․

«Այսօր թշնամին կրկին պատերազմ է սանձազերծել Արցախի դեմ։ Ադրբեջանը՝ Թուրքիայի անթաքույց քաղաքական և ռազմական աջակցությամբ, կրկին փորձում է լուծել ղարաբաղյան հակամարտությունը` զենքի ուժով։

Այսօր ժամանակը չէ խոսելու այն մասին, թե որն էր թշնամու այսչափ լկտիանալու պատճառը։ Հիմա բոլորիս սրբազան պարտքն է պաշտպանել հայրենիքը։ Մենք բոլորս պետք է մեզ Պաշտպանության բանակի զինվոր համարենք, լինենք կազմակերպված, միասնական ու ևս մեկ անգամ, ինչպես դա եղել է 1992-94թթ․, միահամուռ ուժերով ջախջախենք թշնամուն։

Վստահ եմ․ հայկական զինված ուժերը, իրենց թիկունքում ունենալով ողջ աշխարհասփյուռ հայության միակամ աջակցությունը, ի զորու են պաշտպանել Արցախի Հանրապետությունը ու հաղթանակ ապահովել»։

Գեներալ Մանվել Գրիգորյանի՝ սեպտեմբերի 27–ին տարածած հայտարարության մեջ ասվում էր․

«Սիրելի աշխարհասփյուռ հայ ժողովուրդ.

Իմ մարտական ընկերներ, սպաներ, կամավորներ, զինվորներ.

Նորից հայր Ալիևի հետքերով որդի Ալիևը իրենց բնորոշ վախկոտի ոճով՝ Արցախյան ազատամարտի և Ապրիլյան պատերազմի դասերը չմարսած, փորձում է տիրանալ Արցախին՝ խաղաղ ժողովրդին թիրախավորելով: Դա չի հաջողվելու, որովհետև մեր միասնական բռունցքը այս անգամ ևս ջարդ կտա նրանց: Նորից, ավելի համախմբված ու ավելի միասնական ենք՝ պատրաստ մեկ մարդու նման կանգնելու առաջնագծում, մեր զինվորի ու բանակի կողքին:

Իմ հզոր մարտական ոգին ու կամքը Ձեզ հետ է, ու Ձեզ առաջնորդող: Ինչպես 1994-ին ենք հայր Ալիևին չոքացրել ու զինադադր է մուրացել, հիմա դրա տասնապատիկ անգամը կմուրան որդին ու հետևորդները, եթե համը հանեն: Այնպես չանեն, որ բառաչելով, այս անգամ՝ Բաքուն հետ ուզեն: Ալիևը թող չթևավորվի ներքաղաղքական այս իրավիճակից: Ալիևի ատամը չի կարող կտրել Արցախը, որքան էլ երազի դրա մասին»։

Արդարադատության նախկին նախարար, ԱԺ նախկին պատգամավոր Արփինե Հովհաննիսյանն իր ֆեյսբուքյան էջում գրել է․

«Ես առժամանակ օգտագործելու եմ այս հարթակը՝ թվիթերը, իսկական թշնամին այստեղ է վխտում։ Բնակավայրեր գրավելու տեղեկությունը ճիշտ չէ!!! Դա են կեղծում ու տարածում անընդհատ։

Իսկ ֆեյսբուքյան ֆեյքերին ու ֆեյքանման դավաճաններին՝ հետո։

Տարածեք միայն պաշտոնական տեղեկատվություն!!!!»։

ԱԺ նախկին պատգամավոր Էդուարդ Շարմազանովն իր ֆեյսբուքյան էջում գրել է․

«Աստված պահապան մեր ազգին։ Հայ ժողովուրդ, մեր ուժը մեր միասնության մեջ է։ Իսկ նենգ ալիեւները պետք է պարտվեն»։

«Ադեկվադ» միաբանության անդամ Կոնստանտին Տեր–Նակալյանն իր ֆեյսբուքյան էջում գրել է․

«Թուրքը չի նայելու նիկոլական ես, քոչարյանական, հանրապետական, ադեկվադ, թե ինչ: Թուրքը կարանա՝ սպանելու ա: Մեզնից հասնում ա՝ դա թույլ չտալ:

Եթե դու կարող ես օգտակար լինել՝ եղի:

Եթե չես կարող՝ մի խանգարի:

Ներքին բոլոր հարցերը՝ թուրքերի հետ հարցը լուծելուց հետո:

Այսքանը: Առաջիկա օրերին ես երևի չեմ լինի ֆեյսբուքում, խիստ չդատեք, լինելու եմ այնտեղ, որտեղ պետք եմ»։

«Հայաստան համահայկական հիմնադրամի» նախկին գործադիր տնօրեն Արա Վարդանյանն իր ֆեյսբուքյան էջում գրել է․

«Բոլորս մի կողմ ենք դնում քաղաքական տարաձայնությունները։

Մենք մեր բանակի կողքին ենք։ Փառք մեր բանակին»։

***

«․․․լսել միայն հայկական պաշտոնական աղբյուրներով տարածված նորությունները։ Չտարածել որևէ այլ աղբյուրների կողմից տրամադրվող լուրեր։

Իշխանության ներկայացուցիչներին խնդրում են համակարգել ողջ տեղեկությունը և տարածել այն միայն մեկ աղբյուրից։

Հաղթանակը մերն է լինելու»։

«Մեկ Հայաստան» կուսակցության համահիմնադիր Վլադիմիր Մարտիրոսյանն իր ֆեյսբուքյան էջում գրել է․

«Հիշենք այս օրերը: Հիշենք, թե ինչու՞ ենք միասնական ու համախմբված, շատ կազմակերպված և վեհ: Հիշենք, դասեր քաղենք և վերջնականապես ընկալենք, որ միասնականությունը ազգի գերակայությունների շուրջ է, այլ ոչ թե «քաղաքական ժողովրդի շահի»: Հիշենք ու հասկանանք, որ միասնություն հնարավոր է հաստատել բացառապես գերնպատակի շուրջ, այլ ոչ թե քաղաքական շահի: Այս օրերին ազգը համախմբվեց ու ինքնակազմակերպվեց` մոռանալով քաղաքականը, իշխանականը, ընդդիմադիրը: Մենք նորից կտարանջատվենք ու մեզ նորից կտարանջատեն ըստ շահի ու քաղաքականի, բայց հիշենք այս օրերը, փորձելով քիչ թե շատ հասունանալ` ընկալելով գերակայությունը:

Մոռացեք հին ու նոր Հայաստան կոչեցյալները: Հայաստանի դարդն ու ցավը, վերքն ու դարմանը, ուժն ու կորովը մեկն են ու նույնը: Արցախյան գոյամարտի հաղթանակի գրավականը նոր սերունդի շունչն ու գաղափարն է, իսկ այդ գաղափարի միջուկն այն է, որ Արցախ պետությունը ունի ռազմահայրենասիրության նախարարություն, շեշտում եմ` ՌԱԶՄԱՀԱՅՐԵՆԱՍԻՐՈՒԹՅԱՆ:

P.S. Դռները բաց պահեք, տղերքը #հաղթած հետ են գալու»։

ՀՅԴ ԳՄ ներկայացուցիչ Իշխան Սաղաթելյանն իր ֆեյսբուքյան էջում գրել է․

«Դաշնակցության գումարտակը պատրաստ է։

Այս պահից մենք բոլորս հայոց բանակի զինվորն ենք և պատրաստ ցանկացած մարտական առաջադրանքի:

#ՀԱՂԹԵԼՈՒԵՆՔ»։

***

Իշխան Սաղաթելյանը ԶԼՄ–ների հետ զրույցում հայտարարել է․

«Որևէ ներքաղաքական հարցի մասին այս պահին խոսելն անմտություն է, քանի որ պատերազմի մեջ ենք»։

ԱԺ նախկին պատգամավոր Նաիրա Զոհրաբյանն իր ֆեյսբուքյան էջում գրել է․

«Ադրբեջանը Արցախի ուղղությամբ օդային և հրթիռային հարձակում է սկսել: Այս պահին համախմբվել է պետք:

Հետո արդեն գալու է շատ լուրջ և ծանր հարցեր քննարկելու ժամանակը:

Սիրելի հայրենակիցներ, մեզ հիմա մեկ բան է անհրաժեշտ` աննախադեպ համազգային համախմբում»։

ՀՅԴ ՀԳՄ սեպտեմբերի 27–ի հայտարարությունը․

«Սիրելի հայրենակիցներ,

Այսօր առավոտյան ադրբեջանական բանակը Արցախի հետ շփման ողջ երկանքով անցել է հարձակման: Հերթական անգամ Ադրբեջանը սանձազերծել է պատերազմական գործողություններ: Մեր հաղթանակի գրավականն է ամուր թիկունք, ժողովրդի համախմբում, միասնականություն:

Հ.Յ. Դաշնակցությունը, իր ողջ համահայկական կարողականությամբ և վճռականությամբ կագնած է հայոց բանակի կողքին: Այս պահից մենք բոլորս հայոց բանակի զինվորն ենք և պատրաստ ցանկացած մարտական առաջադրանքի:

Համոզված ենք. այս ճակատամարտում ևս հայ ժողովրդը կարձանագրի իր հաղթանակը:

Հայ Յեղափոխական Դաշնակցության

Հայաստանի Գերագույն մարմին»։

Հայաստանի Հանրապետական կուսակցության սեպտեմբերի 27–ի հայտարարությունը․

«․․․Այս վճռական պահին Հայաստանի Հանրապետական կուսակցության Գործադիր մարմինը համերաշխության եւ միասնության կոչ է անում մեր բոլոր հայրենակիցներին` վերահաստատելով իր պատրաստակամությունը՝ կանգնելու հայրենիքի, պետության եւ հայ զինվորի կողքին:

Նենգ թշնամու կողմից պարտադրված պայքարում այլևս յուրաքանչյուրս մեր հայրենիքի պաշտպանն ենք: Մենք պարտավոր ենք սթափ գնահատել ստեղծված իրավիճակը եւ լինել մեր բանակի կողքին, նրա շարքերում, նաև ամուր թիկունք լինել` անկախ քաղաքական տարաձայնություններից:

Քանի որ հայրենիքն ամենաթանկն է եւ նրա պաշտպանությունը վեր է ամեն ինչից:

ՀՀԿ-ն ներդնում է իր ողջ ներուժը, այդ թվում՝ փորձառությունն ու դիվանագիտկան կապերը՝ սատար կանգնելու Արցախի ժողովրդի անկախության սրբազան պայքարին:

Արցախը չի՛ լինելու Ադրբեջանի կազմում երբեք: Աստված պահապան մեր ժողովրդին եւ արդար պայքարին»։

«Հայրենիք» կուսակցության սեպտեմբերի 27–ի հայտարարությունը․

«Վաղ առավոտից ադրբեջանական կողմը Արցախի շփման գծի ողջ երկայնքով սանձազերծել է ռազմական գործողություններ, որին հայկական Զինված Ուժերը տվել և տալիս են արժանի հակահարված։

«Հայրենիք» կուսակցությունը, մի կողմ դնելով իշխանությունների հետ առկա քաղաքական բոլոր տարաձայնությունները, այս պահին ամբողջ կազմով համախմբված է հայկական բանակի, Հայաստանի և Արցախի պետությունների շուրջ և ունեցած ողջ կարողությամբ նպաստելու է հաղթանակին:

Հայկական Զինված Ուժերը եղել են և շարունակում են մնալ ամենամարտունակը տարածաշրջանում: Մենք հաղթել ենք նախորդ բոլոր պատերազմներում, #հաղթելուենք նաև հիմա»:

«Ադեկվադ» միաբանության սեպտեմբերի 27–ի հայտարարությունը․

«Ադեկվադ միաբանությունը ուշադիր հետևում է ռազմաքաղաքական զարգացումներին:

Իրավիճակի գնահատականը պարզ է ու հստակ՝ մեր նկատմամբ հերթական անգամ սանձազերծվել է պատերազմ:

Ստեղծված իրավիճակում Ադեկվադ միաբանությունն ունի միակ դիրքորոշում՝ մենք մեր Պետության և Զինված Ուժերի կողքին ու տրամադրության տակ ենք և սպասում ենք հրահանգների:

Իրավիճակն ունի միայն մեկ հանգուցալուծում՝ մենք պետք է հաղթենք և յուրաքանչյուրս իր լուման պետք է դնի այդ հաղթանակի կերտման գործում»:

14 կուսակցությունների հայտարարությունը․ Ողջ ներուժով սատարում ենք Հայոց բանակին և աջակցում Հայաստանի և Արցախի Հանրապետություններին

«Կոպտորեն խախտելով բազմիցս ստանձնած միջազգային հանձնառությունները, 1994 թ. հրադադարի մասին եռակողմ համաձայնագիրը, ինչպես նաև արհամարհելով ՄԱԿ-ի գլխավոր քարտուղարի՝ համավարակի պայմաններում ռազմական գործողությունները դադարեցնելու կոչը, ս.թ. սեպտեմբերի 27-ի առավոտյան ադրբեջանական բանակը Արցախի հետ շփման ողջ երկայնքով անցել է հարձակման:

Ադրբեջանը, Թուրքիայի բացահայտ աջակցությամբ և խրախուսմամբ, Արցախի Հանրապետության նկատմամբ սկսել է լայնածավալ ռազմական գործողություններ՝ թիրախավորելով նաև բնակավայրեր և խաղաղ բնակչությանը:

Պաշտպանության բանակը հաստատակամ իրականացնում է հակառակորդին դիմակայելու իր առաքելությունը:

Այս բախտորոշ պահին առաջնային է համահայկական կարողականության մեկտեղումը և միասնական համազգային պատասխանը ագրեսորին:

Մենք՝ Հայաստանի Հանրապետությունում գործող քաղաքական կուսակցություններս, ողջ ներուժով սատարում ենք Հայոց բանակին և աջակցում Հայաստանի և Արցախի Հանրապետություններին՝ միջազգային ասպարեզում բացահայտելու և դատապարտելու թշնամու հերթական ագրեսիան:

Կոչ ենք անում համայն հայությանը համախմբվել այս նպատակների շուրջ՝ ապահովելով ամուր թիկունք և միասնականություն:

Դիմում ենք միջազգային կազմակերպություններին, հանրությանը և պետություններին՝ դատապարտելու հայ ժողովրդի դեմ սանձազերծած ադրբեջանաթուրքական հերթական պատերազմը:

Հաղթանակը մերն է:

«Ազատություն» կուսակցություն
«Ազգային օրակարգ» կուսակցություն
«Ազգային ժողովրդավարական միություն» կուսակցություն
«Ազգային ինքնորոշում միավորում» կուսակցություն
«Բարգավաճ Հայաստան կուսակցություն»
«Երկիր Ծիրանի» կուսակցություն
«Ժառանգություն» կուսակցություն
«Լուսավոր Հայաստան կուսակցություն»
«Հայաստանի դեմոկրատական կուսակցություն
«Հայաստանի Հանրապետական կուսակցություն»
«Հայ Յեղափոխական Դաշնակցություն»
«Հայրենիք» կուսակցություն
«Հանուն սոցիալական արդարության» կուսակցություն
«Մեկ Հայաստան» կուսակցություն»։

Չնայած իշխանության ամենախիստ քննադատների ու ընդդիմադիր կուսակցությունների՝ հանրային համերաշխություն հաստատելու ջանքերին ու ներքին պառակտությունները մի կողմ դնելու կոչերին՝ իշխանությունը պատերազմի ընթացքը կրկին օգտագործեց ընդդիմադիր գործիչների դեմ քարոզչական արշավներ կազմակերպելու, նրանց ճնշելու, ռազմական գործում գիտակ անձանց որոշումների կայացման կենտրոններից հեռու պահելու համար։ Իսկ հայտարարված ռազմական դրությունն ու ընդհանուր զորահավաքը որոշ դեպքերում լրացուցիչ մահակ դարձավ իշխանության ձեռքին՝ ընդդիմադիրներին այսպես ասած «չեզոքացնելու», իրականությունը հնչեցնելու համարձակություն ունեցողներին լռեցնելու, ռազմաճակատի դրությունը կոծկելու ու հանրությանը «արծրունական» իրականություն մատուցելու համար։

Փաստացի, իշխանության ամենախիստ քննադատները, մի կողմ դնելով իրենց անհամաձայնություններն ու առկա տարաձայնությունները, պատերազմի առաջին իսկ օրվանից որդեգրեցին բացառապես «պատերազմական կանոններով» առաջնորդվելու սկզբունքը՝ հանուն Հայաստանի և Արցախի Հանրապետությունների ու հանուն Հայոց բանակի։ Մի բան, ինչն անելու կամք չունեցան ընդդիմադիր Փաշինյանն ու իր թիմը ապրիլյան քառօրյա պատերազմի օրերին։ Մի բան, ինչը խախտեցին Փաշիյանն ու իր թիմը՝ լինելով պատերազմող պետության իշխանության ղեկին։