Վրաստանի վարչապետը վստահ է՝ Արցախյան պատերազմի մարտահրավերը կարող է նոր հնարավորության վերածվել ՀՀ-ի համար
Վրաստանի վարչապետ Իրակլի Ղարիբաշվիլին ՀՀ ԱԺ արտահերթ ընտրություններից հետո ՀՀ վարչապետ Նիկոլ Փաշինյանի հաղթանակը Հայաստանի և հայ ժողովրդի համար նոր դարաշրջանի սկիզբ է համարում։
Ղարիբաշվիլին կրկին շնորհավորեց հայ գործընկերոջն ընտրություններում հաղթելու կապակցությամբ և հայտնեց, որ արդեն ծանոթացել է Փաշինյանի տեսլականին։
«Ես ծանոթացա պարոն վարչապետի նոր տեսլականին, որը միայն զարգացման, իր երկրի և հայ ժողովրդի բարեկեցության հետ է կապված։ Իհարկե, Արցախյան պատերազմը մեր տարածաշրջանի համար բարդ մարտահրավեր էր, բայց այժմ հավատում եմ, որ այդ մարտահրավերը կվերածվի նոր հնարավորության, որը որը բարեկեցություն կբերի Հայաստանին և հայ ժողովրդին»,- նշեց Ղարիբաշվիլին։
