Ունենք մեկ վիրավոր, վիճակը լավ է, ժողովուրդն էլ «դուխով» է. Արարատի մարզպետը՝ Երասխում իրավիճակի մասին
Պաշտպանության նախարարությունը երեկ երեկոյան հայտնել էր, որ ադրբեջանական զինված ուժերը ժամը 18:40-ից սկսած՝ մի քանի ժամ շարունակ, տարբեր տրամաչափի հրաձգային զինատեսակներից գնդակոծել են հայ-ադրբեջանական սահմանի Երասխի հատվածում տեղակայված հայկական դիրքերը, պարբերաբար կիրառել են նաև ականանետեր:
Արդեն գիշերը սոցիալական ցանցերում տեղեկություն տարածվեց, որ վիրավորվել է Երասխի համայնքապետը՝ Ռադիկ Օղիկյանը:
Երասխի բնակիչը 168.am-ի հետ զրույցում այսօր մանրամասնել էր․
«Երեկոյան ժամը 18:30-ի սահմաններում կրակոցներ եղան, մոտ կես ժամ կրակեցին, բայց թույլ էր, իսկ գիշերը 23:00-ի մոտերը ահավոր կրակոցներ սկսվեցին: Էդ գիշերվա ուժեղ կրակոցների ժամանակ է եղել, ասացին՝ գյուղապետն ուսից վիրավորվել է, տեղափոխել են հիվանդանոց…»:
168.am-ը կապ հաստատեց նաև Արարատի մարզպետի ժ/պ Ռազմիկ Թևոնյանի հետ՝ հետաքրքրվելով, թե ինչ տրամադրություններ են Երասխում և արդյո՞ք տեղում ծանոթացել է իրավիճակին։
Ի պատասխան՝ մարզպետը վստահեցրեց.
«Ես երեկվանից այնտեղ եմ եղել, առավոտյան եմ եկել. լրիվ նորմալ է, լրիվ հանգիստ է: Ունենք մեկ վիրավոր, վիճակը լավ է, ժողովուրդն էլ «դուխով» է»:
Հարցին՝ եթե ամեն ինչ շատ լավ է, ինչպե՞ս է Երասխի համայնքապետը վիրավորվել, Ռազմիկ Թևոնյանը զարմանքով արձագանքեց․ «Վա՞յ»։
Նա խնդրեց մանրամասների մասին տեղեկանալ Պաշտպանության նախարարությունից:
