Տրանսֆերային շուկայի հերոսները՝ Մեսսի, Ռամոս և ոչ միայն

Եվրոպայի առաջնությունում ամեն ինչ շատ թեժ է: Ֆուտբոլի ամբողջ մայրցամաքը սպասում է փլեյ-օֆֆի հանդիպումների ավարտին, որոնք, անկասկած, հետաքրքիր, ինտրիգային և դրամատիկ են: Բայց հաջորդ շաբաթ տեղի կունենա մեկ այլ, ոչ պակաս նշանակալից իրադարձություն` ամառային տրանսֆերային պատուհանի բացում: Արդեն տեղի են ունեցել մի քանի աղմկոտ ստորագրություններ, օրինակ՝ Հաքան Չալհանօղլուն «Միլանից» տեղափոխվել է «Ինտեր»: Բայց ամենահետաքրքիրը դեռ առջևում է: Կան մի շարք աստղային ֆուտբոլիստներ, ովքեր մի քանի օրվա ընթացքում կարող են անվճար պայմանագիր ստորագրել: Արդեն վաղը՝ հուլիսի 1-ին, լրանում է այս ֆուտբոլիստներից մի մասի պայմանագրերը։

Մարիո Մանջուկիչ

Հուլիսի 1-ից լրանում է Մանջուկիչի պայմանագիրը «Միլանի» հետ: Ռոսոներիները հնարավորություն ունեին երկարաձգել պայմանագիրը ֆուտբոլիստի հետ, բայց նրանք այն չակտիվացրին: Այս որոշումը «կարմիր-սևերը» հայտարարեցին անցած մրցաշրջանի վերջին: Մարիոյի վերադարձը Եվրոպա Կատարից հետո, մեղմ ասած, անհաջող ստացվեց: Բոլոր մրցաշարերում խորվաթը մասնակցել է «Միլանի» 11 հանդիպման (ընդհանուր 287 րոպե) և իրեն չի դրսևորել ոչ մի արդյունավետ գործողությամբ: Փորձառու հարձակվողը ոչինչ չի ձեռնարկել «ռոսոներիներին» օգնելու համար: Բայց հանգամանքներն այսպես զարգացան: Մանջուկիչի փորձին և հմտություններին ոչինչ չի եղել: Միգուցե հարձակվողն ավելի բախտավոր լինի մեկ այլ ակումբում: Մինչ այժմ 35-ամյա ֆուտբոլիստը չի հայտարարել կարիերան ավարտելու պլանների մասին, ուստի մենք դեռ կկարողանանք տեսնել նրան խաղադաշտում:

Ստեֆան Յովետիչ

Եվս մեկ փորձառու հարձակվող, որն օրերս կդառնա ազատ գործակալ: Ֆուտբոլիստի պայմանագիրը «Մոնակոյի» հետ ավարտվում է և չի երկարաձգվի: Անցած մրցաշրջանի Լիգա 1-ում Յովետիչը մասնակցել է 29 հանդիպման, բայց խաղադաշտում միջինը ընդամենը 27 րոպե է անցկացրել յուրաքանչյուր խաղում: Սա նրա կարիերայի ընթացքում ամենավատ ցուցանիշն է: Ստեֆանը 31 տարեկան է՝ հարձակվողի համար նորմալ տարիք: Միանգամայն հնարավոր է, որ առաջիկայում ֆուտբոլիստը հայտնվի ինչ-որ ուժեղ թիմում: Լրատվամիջոցների հաղորդմամբ, «Լացիոն» հետաքրքրված է չեռնոգորցու ծառայություններով: Յովետիչը փորձ ունի Սերիա A-ում, որտեղ նա խաղում էր «Ինտերում» և «Ֆիորենտինայում», այնպես որ, հարձակվողի վերադարձն Իտալիա բավականին հավանական է թվում:

Ժերոմ Բոատենգ

Բոատենգը 10 հիանալի տարի անցկացրեց Մյունխենի «Բավարիայում»: Ֆուտբոլիստը թիմի հետ միասին շահեց բացարձակապես ամեն ինչ՝ հասցնելով Գերմանիայի հավաքականում դառնալ նաև աշխարհի չեմպիոն: Ժերոմը հետաքրքրված էր պայմանագրի երկարաձգմամբ, բայց մյունխենյան ակումբը որոշեց խաղացողին նոր պայմանագիր չառաջարկել: Այժմ 32-ամյա կենտրոնական պաշտպանը նոր մարտահրավեր է փնտրում: Բոատենգը կապված է բազմաթիվ ակումբների հետ՝ «Հերտա», «Լացիո», «Ռոմա», «Բարսելոնա», «Յուվենթուս»։ Գերմանացին շատ տարբերակներ ունի: Ֆուտբոլիստն ինքը նախկինում հայտարարել էր ԱՄՆ-ում խաղալու ցանկության մասին, բայց Ժերոմի համար, հավանաբար, դեռ վաղ է Եվրոպայից դուրս խաղալու համար: Տարիքը, ուժն ու հմտությունը պաշտպանին թույլ են տալիս ևս մի քանի տարի Եվրոպայում անցկացնել բարձր մակարդակով:

Սերխիո Ռամոս

Իհարկե, Ռամոսը կլինի տրանսֆերային շուկայի ամենապահանջված ֆուտբոլիստներից մեկը: Չնայած ֆուտբոլիստը  մարտին 35 տարեկան դարձավ, իսպանացին շարունակում է մնալ Եվրոպայի լավագույն պաշտպաններից մեկը: Արդեն պաշտոնապես հայտնի է,  որ ֆուտբոլիստի պայմանագրի ժամկետը «Ռեալի» հետ չի երկարաձգվի: Սերխիոն «Արքայական ակումբում» 16 փառահեղ տարիներից հետո կհեռանա «Բլանկոսից»: Կասկած չկա, որ Ռամոսը բավական առաջարկներ կունենա կարիերան շարունակելու համար։ Փորձառու պաշտպանին ցանկանում են  տեսնել Անգլիայում և Ֆրանսիայում: Ամենից հաճախ լրատվամիջոցներն իսպանացուն ուղարկում են ՊՍԺ, բայց դա ոչինչ չի նշանակում: Վերջին շրջանում շատ հայտնի խաղացողներ կապվում են «փարիզցիների» հետ: Ֆուտբոլիստն ինքը հնարավորինս զուսպ է խոսում իր ապագայի մասին: Նա դեռ չի կարող հավատալ, որ հեռանում է այն ակումբից, որտեղ ցանկանում էր ավարտել կարիերան:

Ջանլուիջի Դոնարումա

Դոնարումայի հեռացումը «Միլանից» մեծ նորություն էր: «Ռոսոներիների» աշակերտը ոչ միայն ավելի ու ավելի շատ գումար էր պահանջում, այլև նա ոչինչ չթողեց իր հայրենի ակումբին: Մի քանի օրից Ջիջին ազատ գործակալի կարգավիճակով կհեռանա «կարմիր-սևերից»:

Իտալիայում գրում են, որ 22-ամյա դարպասապահի տեղափոխությունը ՊՍԺ գործնականում կարգավորված խնդիր է: Կողմերը պատրաստվում են համաձայնագիր ստորագրել մինչև 2026 թվականի հունիսը: Բայց ֆրանսիացիները դեռ պաշտոնապես չեն հայտարարել իտալացուն տեղափոխելու մասին, այնպես որ, այլ բան կարող է պատահել: Եղել են դեպքեր, երբ գործարքները չեղյալ են հայտարարվել բժշկական զննումից հետո կամ պայմանագրի կնքումից անմիջապես առաջ: Դոնարուման կարող է զարմացնել, ուստի նրա պարագայում ավելի լավ է սպասել պաշտոնական տեղեկատվության:

Լիոնել Մեսսի

Մեսսիի ապագան «Բարսելոնայում» մի թեմա է, որը անհանգստացնում է ոչ միայն կատալոնական ակումբի երկրպագուներին, այլ նաև ֆուտբոլասերներին ամբողջ աշխարհում: Դժվար է պատկերացնել Լիոնելին ոչ կապտանռնագույն համազգեստով: Լրատվամիջոցների հաղորդմամբ՝ արգենտինացին համաձայնվել է «Բարսելոնայի» հետ պայմանագիրը երկարաձգել, սակայն այս տեղեկատվության պաշտոնական հաստատում չկա: Ավելին, կատալոնական ակումբի նախագահ Ժոան Լապորտան զուսպ է մեկնաբանում թիմի ղեկավարի հետ կապված իրավիճակը՝ պահպանելով զգուշությունը: Անցած մրցաշրջանի ընթացքում Մեսսին ասոցիացվում էր ՊՍԺ-ի և «Մանչեսթեր Սիթիի» հետ, բայց արգենտինացին դժվար թե բանակցի ուրիշի հետ, բացի կապտանռնագույններից։ Հավանականությունը, որ Լեոն կերկարաձգի պայմանագիրը «Բարսելոնայի» հետ, դեռ մեծ է: Բայց մյուս կողմից՝ արդեն վաղը նա կարող է դառնալ ազատ գործակալ, և ո՞վ գիտի, թե ինչպես է իրավիճակը զարգանալու հուլիսից:

Սիրարփի Աղաբաբյան