«Արա Այվազյանը հրաժարական չի տվել և չի տալու՝ սուտ է». Ռուբեն Ռուբինյան

ԱԺ «Իմ քայլը» խմբակցության պատգամավոր, Արտաքին հարաբերությունների մշտական հանձնաժողովի նախագահ Ռուբեն Ռուբինյանի վստահեցմամբ՝ ՀՀ արտգործնախարար Արա Այվազյանը հրաժարական չի տվել և չի տալու։

«Մամուլում դեռ երեկ էր լուրեր շրջանառվում, որ արտգործնախարարը հրաժարական է տվել, երեկ եմ նրա հետ խոսել, այդպիսի բան չկա և դա սուտ է»,- խորհրդարանում լրագրողների հետ զրույցում ասաց Ռուբեն Ռուբինյանը։

Անդրադառնալով փոխարտգործնախարար Ավետ Ադոնցի այն հայտարարությանը, որ տեղյակ չէ, թե ինչ փաստաթուղթ է պատրաստվում ստորագրել Նիկոլ Փաշինյանը, Ռուբեն Ռուբինյանը նկատեց՝ նորմալ է, որ մեկ փոխնախարարը կարող է տեղյակ չլինել մյուս փոխնախարարի կուրացիայի ոլորտից։

«Արտգործնախարարության այն բոլոր պաշտոնյաները, որոնք պետք է տեղյակ լինեն գործընթացից՝ տեղյակ են, երեկ ես այդ փաստաթուղթը տեսել եմ։ Մինչ այդ պահը ես իմացել եմ, ի դեպ, դուք նույնպես իմացել եք, որովհետև Անվտանգության խորհրդի քարտուղարը, մինչ նույնիսկ այդ արտահոսքը, հրապարակավ ասել է, որ ռուսական կողմից ստացել են առաջարկ՝ ստեղծել դեմարկացիայի հանձնաժողով, և մեր դիրքորոշումն այն է, որ մենք դեմ չենք դրան, բայց մինչ այդ ադրբեջանական զորամիավորումները պետք է լքեն ՀՀ տարածքը»,- հավելեց Ռուբեն Ռուբինյանը։

Ինչ վերաբերում է Նիկոլ Փաշինյանի այն հայտարարությանը, որ Ավետ Ադոնցը լսելով Միքայել Մինասյանի անունը՝ սարսափել է, Ռուբեն Ռուբինյանն ասաց, որ Նիկոլ Փաշինյանը նման բան չի ասել։

Հիշեցնենք, որ մայիսի 20-ին Նիկոլ Փաշինյանն անդրադառնալով Ա. Ադոնցի խոսքին, ԱԺ ամբիոնից ուղիղ հայտարարեց. «Ասում են՝ ԱԳՆ-ն տեղյակ չէ. այդ փաստաթղթերը ստացվում են ԱԳՆ խողովակներով, ես ո՞նց եմ ստանում դա, կարո՞ղ է մեկը բացատրել: Դա տրվում է ՌԴ-ում ՀՀ դեսպանատուն, դեսպանատունը ուղարկում է նախարարություն՝ նախարարին, նախարարն էլ ուղարկում է ինձ: Հիմա այնպիսի ժամանակներ են, մարդիկ, եսիմ, երևի Միշիկի անուն լսելիս՝ ոտները թուլանում են, ասում են՝ մենք չենք, մենք չենք»։