Մշակութային ժառանգությունը վերացնող ազգի ներկայացուցիչը չի կարող հավակնել նման պաշտոնի. Հայ ճարտարապետները` ադրբեջանցի թեկնածուի մասին
Միջազգային հեղինակավոր Ճարտարապետների միջազգային միության նախագահի պաշտոնին հավակնում է Ադրբեջանի Ճարտարապետների միության նախագահ Էլբայ Գասիմզադեն:
Հայ ճարտարապետները, մտավորականները կարևորում են այդպիսի բան թույլ չտալը, քանի որ մշակութային ժառանգությունը վերացնող ազգի ներկայացուցիչը չի կարող հավակնել նման պաշտոնի:
Ալեքսանդր Թամանյանի անվան ճարտարապետության թանգարան-ինստիտուտի տնօրեն Մարկ Գրիգորյանը կոչ է արել միջազգային հանրությանն ու ճարտարապետներին՝ թույլ չտալ Էլբայ Գասիմզադեին ընտրվել ճարտարապետների միջազգային միության նախագահ:
«Նա այն մարդն է, որը ողջունել է Արցախի հայկական հուշարձանների ոչնչացումը, Դադիվանքն անվանել է աղվանական հուշարձան, պնդում է, որ հայկական հետք գոյություն չունի, հայերը «քոչվոր ժողովուրդ» են և որևէ պատմական հուշարձանի իրավունք չունեն»,- ասել է Մարկ Գրիգորյանը:
ՀՀ ճարտարապետների պալատի նախագահ Մկրտիչ Մինասյանը մեզ հետ զրույցում հայտնեց, որ Արտաքին գործերի նախարարության միջոցով հայտնել են հայկական կողմի համապատասխան վերաբերմունքը:
«Կից ներկայացվել են նաև նյութեր, փաստեր, թե ինչպես են ադրբեջանցիներն Արցախում վերաբերվում մշակութային ժառանգությանը: Ուղարկել ենք լուսանկարներ՝ գրելով, որ, եթե Ադրբեջանի ճարտարապետների միության նախագահը կարողանում է նման բաներ ասել, ցանկալի չէ, որ ընտրվի այդ պաշտոնում»,- մանրամասնեց Մկրտիչ Մինասյանը:
Խոսելով ճարտարապետների միջազգային միության նախագահի գործունեության մասին՝ ՀՀ ճարտարապետների պալատի նախագահը նշեց, որ կարգավորում են մասնագիտական դաշտը, ելույթներ են ունենում և այլն:
«Կարգավորում է 5 ռեգիոնները՝ Արևմտյան Եվրոպա, Արևելյան Եվրոպա և մի քանի երկրներ, այդ թվում՝ Հայաստան, Հունաստան, Կիպրոս, Թուրքիա և այլն: Մյուսը ԱՄՆ-ն է, և այլն: Այսինքն՝ ռեգիոնի համար են նախագահ ընտրելու, ոչ թե ընդհանուր ճարտարապետների միջազգային միության համար: Բացի Ադրբեջանի ներկայացուցչից, հայտեր են ներկայացրել նաև ուրիշ երկրներ: Հիմա դեբատները շարունակվում են, իսկ թե որ երկրներից են թեկնածուները, դեռևս տեղյակ չեմ»,- նշեց Մկրտիչ Մինասյանը:
Հավելենք, որ Ճարտարապետների միջազգային միությունը (UIA) Շվեյցարիայում հիմնադրված հասարակական կազմակերպություն է, որին անդամակցում են ճարտարապետներ 115 երկրից:
1961 թվականից Ճարտարապետների միջազգային միությունը հանձնում է 4 մրցանակներ.
Օգյուստ Պեռե մրցանակ՝ ճարտարապետության մեջ կիրառվող տեխնոլոգիայի համար
Պատրիկ Աբերկրոմբի մրցանակ՝ քաղաքաշինության կամ տարածքային զարգացման համար
Ժան Չումի մրցանակ՝ ճարտարապետական քննադատության կամ ճարտարապետական կրթության համար
Ռոբերտ Մեթյուի մրցանակ՝ բնակավայրերի որակի բարելավման համար:
