Հնդկաստանը նորացրել է կորոնավիրուսի դեպքերի օրական աճի ռեկորդը
Հնդկաստանում հայտնաբերված կորոնավիրուսային ինֆեկցիայով վարակվածների թվի օրական աճը կազմել է 379 հազար 257, ավելի քան 3,6 հազար մարդ մահացել է: Սրանք առավելագույն ցուցանիշներն են համավարակի սկզբից ի վեր: Այդ մասին հաղորդել է երկրի առողջապահության նախարարությունը: Հնդկաստանն աշխարհում երկրորդ տեղում է գտնվում կորոնավիրուսի հայտնաբերված դեպքերի թվով:
Առողջապահության նախարարության վերջին տվյալների համաձայն, ընդամենը երկրում գրանցվել է COVID-19-ի ավելի քան 18,3 միլիոն դեպք: Ապաքինվել է 15 միլիոնից ավելի մարդ, կորոնավիրուսից և ուղեկցող հիվանդություններից մահացել է 204 հազար մարդ: Հիվանդացածների թվի աճը Հնդկաստանում շարունակվում է փետրվարի կեսերից, ինչի արդյունքում COVID-19-ից բուժվողների թիվն ավելացել է՝ հասնելով ավելի քան 3 միլիոնի: Հնդկաստանում հիվանդացածների առավել մեծ թիվը բաժին է ընկել Մահարաշտրայի նահանգին: Անցած օրվա ընթացքում նահանգում հայտնաբերվել է ավելի քան 63,3 հազար հիվանդացած, ընդամենը նահանգում կորոնավիրուսի դեմ բուժում է ստանում 675 հազարից ավելի մարդ: Մահարաշտրայից հետո հիվանդության առավել մեծ թվով նոր դեպքերը հայտնաբերվել են Կառնատակայի նահանգում (39 047), Քերալայում (35 013), Ութար Փրադեշում (29 751) և Դելիում (25 986):
Դրա հետ մեկտեղ առողջապահության նախարարությունը նշել է, որ Հնդկաստանում կորոնավիրուսի դեմ պատվաստում է ստացել ավելի քան 150 միլիոն մարդ, միայն վերջին օրվա ընթացքում պատվաստում ստացածների թիվն ավելացել է 2,1 միլիոնով: Ապրիլի 28-ի գիշերը Ռուսաստանի արտակարգ իրավիճակների նախարարության երկու ինքնաթիռ այս երկիր է հասցրել COVID-19-ի դեմ պայքարի ավելի քան 20 տոննա միջոցներ, ներառյալ սարքավորումներ՝ թթվածքի մշակման համար, թոքերի արհեստական օդափոխման սարքեր և դեղամիջոցներ, հաղորդել է ՌԻԱ Նովոստին:
