«Քաղաքական հոսանքները կգան ու կգնան, քո արժեքը չգիտակցող մարգինալները կանհետանան պատմության փոշու մեջ․․․». Էդմոն Մարուքյան
«Լուսավոր Հայաստան» կուսակցության նախագահ Էդմոն Մարուքյանը ֆեյսբուքյան իր էջում գրել է.
«Ես չեմ կասկածում, որ մենք համատեղ ուժերով վերականգնելու և վերազինելու ենք մեր զինված ուժերը և դա անելու ենք կրկնակի խնամքով և ջանասիրությամբ։
Պատերազմում ստացած ծանր հարվածն իր վրա վերցրեց հենց Հայոց բանակը։
Հայ զինվորն ու սպան ամեն ինչ արեցին հայրենիքի սահմանները պաշտպանելու համար:
Ահռելի կորուստներից զատ փորձ արվեց ամբողջ պատասխանատվությունը բարդել բանակի վրա։
Մեր հերոս տղաների անձնուրացությունը մեզ միայն պարտավորեցնում է, որ դասեր քաղենք քաղաքական ապաշնորհ կառավարումից:
Բայց նույնիսկ այս ծանրագույն կորուստների և քաղաքական անպատասխանատվության պայմաններում որևէ մեկը չի չեղարկել այն ճշմարտությունը, որ Հայոց Բանակը Հայաստանի և Արցախի բնականոն գոյության երաշխավորն է։
Այդպես եղել է ու միշտ էլ կլինի, և ես չեմ կասկածում, որ մենք համատեղ ուժերով վերականգնելու և վերազինելու ենք մեր զինված ուժերը և դա անելու ենք կրկնակի խնամքով և ջանասիրությամբ։
Շնորհավոր ծնունդդ, Հայո՛ց Բանակ և Հա՛յ Զինվոր։
Քաղաքական հոսանքները կգան ու կգնան, քո արժեքը չգիտակցող մարգինալները կանհետանան պատմության փոշու մեջ, բայց դու կմնաս ու կապրես՝ որպես Հայաստանի, Արցախի Հանրապետությունների ու ամբողջ հայ ազգի պաշտպան»։
