Նոնսենս է, պետական համակարգում նման բան երբեք չի եղել. Քարտեզագիրը՝ իր հարցի ու կառավարությունից ստացած պատասխանի մասին
Քարտեզագիր, տեխնիկական գիտությունների թեկնածու Շահեն Շահինյանը տարեվերջին գրություն էր ուղարկել Կառավարություն՝ խնդրելով տրամադրել փաստաթղթեր, կոորդինատներ, նկարներ, ինչ-որ հիմնավորում, թե ո՞րն է Հայաստանի միջազգայնորեն ճանաչված սահմանը: Նաև հարցման մեջ եղել է, թե ո՞ր թվականի քարտեզով է իրականացվելու սահմանազատումը:
Ավելի վաղ՝ նոյեմբերի 23-ին էլ բաց նամակ էր հղել ՀՀ վարչապետին ու Արցախի նախագահին՝ նշելով, որ մտահոգված է այս պահին Արցախի սահմանների որոշման գործընթացներով։ Նա անհրաժեշտ է համարել այս աշխատանքներում գեոդեզիստների, քարտեզագիրների և այլ մասնագետների ներգրավումը՝ կարևորելով սահմանազատումից առաջ ուսումնասիրելը նախկինում գոյություն ունեցած բոլոր նյութերը, քարտեզները, տեքստային և այլ տիպի տվյալները, որոշելը, թե որ կոորդինատային համակարգում են որոշվելու սահմանների կոորդինատները և ի՞նչ ճշտություն (թույլատրելի շեղում) են ունենալու, ի՞նչ սարքավորումներով, սկզբունքներով և մեթոդներով են իրականացվելու սահմանազատման (դեմարկացիայի) կամ անգամ ժամանակավոր սահմանների որոշումը։
Հունվարի 19-ին ստացել է իր նամակի պատասխանը՝ վարչապետի աշխատակազմից, Տարածքային կառավարման և ենթակառուցվածքների նախարարությունից:
Սակայն նա չի հասկանում՝ ինչի հիման վրա է վարչապետի աշխատակազմում աշխատող Ս․ Միքայելյանի կատարմամբ և Քաղաքացիների ընդունելության և դիմումների քննարկման վարչության պետ Ալեքսանդր Ղազարյանի ստորագրությամբ գրությունը 14․01․2021թ. վերահասցեագրվել Տարածքային կառավարման և ենթակառուցվածքների նախարարություն, որ պատասխանեն: Այստեղից էլ 19․01․2021թ. պատասխանել են, որ դիմումում բարձրացված հարցերը դուրս են նախարարության իրավասությունների շրջանակից:
168.am-ի հետ զրույցում Շահեն Շահինյանը հայտնեց, որ ինչ գնով էլ լինի՝ իր հարցերի մասին փորձելու է տեղեկացնել կառավարության վերին օղակներին:
«Ես հիմա մտածում եմ, թե ինչ կարելի է անել, որ այդ նամակը տեղ հասնի, որովհետև, ինչպես տեսա՝ այն հասել է նամակների վարչության պետի մակարդակի ու այնտեղից գնացել է: Դա ինձ համար նոնսենս է: Պետական համակարգում նման բան երբեք չի եղել, որ նամակով դիմես մի կառույցի, որն էլ իր հերթին՝ փոխանցի այլ կառույցի, վերջինն էլ պատասխանի՝ դա մեր գործը չէ: Ես լավ գիտեմ, որ իրենց գործը չէ, դրա համար էլ իրենց չէի ուղարկել»,- նշեց Շահեն Շահինյանը:
Քարտեզագիրը շեշտեց՝ դիմել է վարչապետին, քանի որ նա՝ իր հիշելով, 5 թե 7 անգամ լրատվամիջոցներում հայտարարել է, որ Հայաստանի միջազգայնորեն ճանաչված տարածքից ոչ մի միլիմետր չի զիջվելու, և խնդրել է տրամադրել տվյալներ, որպեսզի ինքը՝ որպես ՀՀ քաղաքացի, կարողանա տեսնել՝ ո՞րն է ՀՀ միջազգայնորեն ճանաչված սահմանը:
