Արամ Ա կաթողիկոսը շնորհավորական ուղերձ է հղել Ջո Բայդենին՝ ԱՄՆ նախագահի պաշտոնը ստանձնելու առիթով
Մեծի Տանն Կիլիկիո Արամ Ա կաթողիկոսը շնորհավորական ուղերձ է հղել Ջո Բայդենին` Ամերիկայի Միացյալ Նահանգների նախագահի պաշտոնը ստանձնելու առիթով: Այն հրապարակված է կաթողիկոսի «Ֆեյսբուքի» պաշտոնական էջում:
Նորընտիր նախագահին ուղղած իր նամակում Նորին Սրբությունը հայտնել է, որ մեր ժողովուրդը և հատկապես Միացյալ Նահանգներում հաստատված հայերը պատրաստ են գործակցելու իր և իր ղեկավարած վարչակազմի հետ՝ հանուն մարդու իրավունքների ու արժեքների պաշտպանության, Միացյալ Նահանգների ու Հայաստանի կապերի ամրացման, ինչպես նաև աշխարհում խաղաղության հաստատման:
Նորին Սրբությունը հիշեցրել է, որ նախագահ Բայդենը Սենատի անդամ եղած տարիներից սկսած բարեկամական կապեր է հաստատել հայ ժողովրդի հետ և հատուկ հարգանք է ցուցաբերել Հայոց ցեղասպանության նահատակների հիշատակի նկատմամբ: Հայրապետը վստահություն է հայտնել, որ Նախագահը վերանորոգ կերպով պիտի շարունակի պաշտպանել ժողովրդավարության, ժողովուրդների ինքնիշխանության և ցեղասպանության կանխարգելման աշխատանքները և այս առումով հույս հայտնեց Միացեալ Նահանգների կողմից Հայոց ցեղասպանության պաշտոնական ճանաչման վերաբերյալ:
Արամ Ա. Կաթողիկոսն իր հաջողության մաղթանքներն է փոխանցել ԱՄՆ նախագահին:
