«50 դրա՞մն է քեզ համար թանկ, թե՞ հայրենիքը»․ Ռուսլան Բաղդասարյանը՝ Հայկ Մարությանին
Ռուսլան Բաղդասարյանը ֆեյսբուքյան իր էջում գրում է․ «Այսօր լրատվամիջոցներից մեկում հանդիպեցի մի հոդվածի, որտեղ ներկայացվում էր, թե որքան լարված են Նիկոլի ու քաղաքապետ Հայկի հարաբերությունները: Որ պատեհ-անպատեհ նա հայհոյում է Հայկին և բարձրաձայնում Հայկին քաղաքապետ դարձնելու սխալ լինելը:
Որ Հայկ Մարությանը Երևանի վատագույն քաղաքապետն է և ձախողել է մեր քաղաքի կառավարումը, խոսել եմ երկու տարուց ավելի: Որ մշտապես պահանջել եմ քաղաքապետի հրաժարականը՝ երևանցիներին խաբելու համար, իմ կողմից եղել են բազմաթիվ հարցազրույցներ և հրապարակումներ: Հրաժարականի տրամաբանությունս նրանում էր, որ Երևանում կայանային նոր ընտրություններ՝ ոչ էյֆորիկ վիճակում:
Իսկ ի՞նչ իրավիճակ ունենք հիմա.
Կա երկու տարբերակ՝
առաջինը՝ Հայկի հրաժարականի դեպքում, ընտրել ավագանու անդեմ ուսապարկերից մեկին (ՔՊ-ականներն են իրենց ցուցակներով ընտրվածներին համեմատում ուսապարկերի հետ): Այդ դեպքում Երևանից կմնան փլատակներ՝ Հայկ Մարությանից հետո դա կլինի վերջնական հարված Երևանին՝ մեր քաղաքին նիկոլը նոկաուտի կենթարկի:
Երկրորդ տարբերակը նոր ընտրություններն են: Ինչպես գիտենք, բոլոր պետություններում ընտրություններ անցկացնելը սթրես է պետության համար: Ինչքան ամուր է պետական համակարգը, այնքան այդ սթրեսը պետությունը թեթև է տանում:
Արդյո՞ք մեր պետական համակարգն ամուր է, միանշանակ ո՛չ:
Այսինքն նոր ընտրության տանելով՝ Նիկոլը նոկաուտի կենթարկի ամբողջ պետությունը:
Էնպես որ՝ Նիկոլը թող ոչ մի տեղ չփնտրի արկածախնդրություն, որովհետև բոլոր պրոբլեմների լուծումները սկսվելու են իր իսկ հրաժարականից հետո:
Ինչ վերաբերում է Հայկ Մարությանին, մի անգամ ասել եմ իր անելիքները.
1. մեր հանրությունից ներողություն է խնդրում սև-սպիտակ թեզը առաջ քաշելու համար:
2. հենց ինքն է հրապարակային պահանջում իր «երբեմնի» ղեկավարի հրաժարականը:
3. մասնակցում է Արցախի ու մեր ամբողջ հայրենիքի համար քաղաքացիական անհնազանդություններին, չէ՞ որ 50 դրամի համար ինքը դա անում էր:
Հիմա հարց Հայկ Մարությանին՝ 50 դրա՞մն է քեզ համար թանկ, թե՞ հայրենիքը»:
