«20 տոկոս անկում կա ներմուծման, արտահանման, սպառման ոլորտներում». Էկոնոմիկայի նախարար
Այսօր Կառավարության նիստից հետո ճեպազրույցի ժամանակ ՀՀ Էկոնոմիկայի նախարար Վահան Քերոբյանը լրագրողների հարցին ի պատասխան՝ ասաց, որ 2020թ․ տնտեսական մի շարք ոլորտներում ունեցել ենք անկում:
«Ներմուծում, արտահանում, սպառում, մոտավորապես 20 տոկոս այդ երեք ոլորտներում կա անկում: Տնտեսական անկումը 8.5 % կլինի, իմ կարծիքով»,- ասաց Քերոբյանը:
Հարցին, թե ի՞նչ քայլեր են ձեռնարկվում տնտեսությունը ստեղծված իրավիճակից հանելու համար, նախարարը պատասխանեց, որ երկար ցուցակ ունեն քայլերի՝ պաշտպանելու տնտեսական պոտենցիալը և տնտեսվարողների համար առավել բարենպաստ պայմաններ ստեղծելու համար:
Վահան Քերոբյանը նաև նշեց, որ լավատես է 2021-ի հետ կապված։
«Իմ կարծիքը և իմ լավատեսությունը տնտեսության նկատմամբ չի փոխվել: Երկնիշ տնտեսական աճն իմ թիրախն է»,- ասաց Քերոբյանը։
