«Արծրուն Հովհաննիսյանը, նստած Ստեփանակերտի միասնական կենտրոնում, ստատուս է գրում, որ՝ էս պահին ես գտնվում եմ Հադրութում». Հարություն Հարությունյանը՝ պաշտոնական լրատվության մասին

«5-րդ ալիք» հեռուստատեսության գործադիր տնօրեն Հարություն Հարությունյանը Կառավարության առջև հացադուլ հայտարարած քաղաքացիներին այցի ժամանակ պատասխանեց լրագրողների հարցերին: Անդրադառնալով իշխանության ներկայացուցիչների կողմից իրենց լրատվամիջոցի թիրախավորման դեպքերին, իրենց լրատվամիջոցից խուսանավելու բազմաթիվ փաստերին՝ Հարություն Հարությունյանը նշեց. «Բնական է, որ այդ կարգի մարդիկ կամ քաղաքական գործիչները պետք է խուսափեն այն հարթակներից, որտեղ իրենց հետ նախապես պայմանավորված չեն հարցազրույցները, թե ինչի մասին խոսեն:

Տեսե՛ք ամենավերջին ցայտուն օրինակը Լենա Նազարյանի՝ Հ1-ում հարցազրույցն էր, որտեղ, ի զարմանս ինձ (չնայած հիմա հասկանում եմ` ինչու),  Հ1-ի հարցազրուցավարը մեկ-երկու չնախատեսված հարցեր տվեց, և մենք տեսանք՝ ինչ կատարվեց:

Հիմա, պատկերացրեք` նրանք գալիս են մեզ մոտ, և մենք նախապես իրենց հետ չենք պայմանավորվել  հարցերի շրջանակը, կամ հարցերը նախապես չենք գրել-ուղարկել, կամ իրենց հետ չենք նստել պարապել, ո՞նց գան մեզ մոտ:

Այս իշխանությունների, Ազգային ժողովի հիմնական մասը պատրաստ չէ ոչ մի դիկուրսի, ոչ մի տեսակի հարցազրույցի: Իրենց այդ ամեն ինչը տրվել է օդից, և իրենք այդ ամենը հիմա վայելում են»:

Լրագրողները «5-րդ ալիք» հեռուստատեսության գործադիր տնօրենին հիշեցրին ԱԺ իշխանական խմբակցության պատգամավոր Քրիստինե Պողոսյանի հայտնի սպառնալից հայտարարությունը՝ ուղղված իրենց լրագրողին,  թե՝ «թող պատերազմը պրծնի, նոր ձեր հալը կտենաք», և  հետաքրքրվեցին, թե պատերազմի ավարտից հետո ի՞նչ է եղել, նա պատասխանեց.  «Երկու գործ կա: Մի գործը՝ մենք դիմեցինք դատախազություն, դատախազությունը մակագրել է ՀՔԾ,  սա քրեական ուղղությամբ, և երկրորդ գործն արդեն ընդունվել է վարչական դատարան, որտեղ մենք պահանջել ենք  840 հազար դրամի փոխհատուցում և տեղում այդ գումարի փոխանցումը Զինապահովության հիմնադրամ:

Ինչո՞ւ  840 հազար.  մենք հաշվի ենք առել պատգամավորի աշխատավարձն ու մեկ ամսվա պարգևավճարը: Սպասում ենք դատական պրոցեսի»:

Արդյո՞ք իշխանության կողմից լրատվամիջոցի հետ հաշվեհարդար տեսնելու միջադեպեր չեն եղել՝ հաջորդ հարցին էլ ի պատասխան՝ Հարություն Հարությունյանը նկատեց.  «Իշխանություն կա՞:  Հենց իշխանություն լինի, կխոսենք այդ մասին»:

Լրագրողները լրատվամիջոցի տնօրենից հետաքրքրվեցին նաև հասարակական հնչեղություն ունեցող հարցերի մասին՝ մասնավորապես, թե ինչու է գերիների փոխանակման հարցերի և նրանց թվի շուրջ ցայսօր տիրում անհստակություն:

«Ինձ հարցեր եք տալիս, որոնք պետք է ուղղեք ՀՀ Պաշտպանության նախարարությանը  կամ Հանրապետության  վարչապետին, որն իրեն տվյալ դեպքում համարում էր Գլխավոր Գերագույն հրամանատար:  Ես չեմ կարող էդ հարցին պատասխանել, բայց ես կարող եմ մի փոքր նյուանս հիշեցնել, որ ռազմագերիների և կորած երեխաների զինծառայողների ծնողների հետ հանդիպման ժամանակ լրատվամիջոցները չեն մասնակցել, և նրանց ծնողներին ստորաբար խաբել են՝ ասելով, թե եթե լրատվամիջոցները մասնակցեն, ձեր երեխաների համար վատ կլինի էն մյուս կողմում, -ի պատասխան՝ ասաց Հ. Հարությունյանը՝ հավելելով, որ սա միտումնավոր ասված խոսք է, որի նպատակն է ծնողներին տրամադրել լրատվամիջոցների դեմ,- Աբսուրդն այն է, որ ինքը հանդիպում է զոհված և անհետ կորած զինծառայողների ծնողների հետ, և չկա լրատվամիջոց»:

Դիտարկմանը, թե Կառավարությունում հանդիպումներից հետո ծնողները նաև խուսափում են լրատվամիջոցներից, նա արձագանքեց. «Պետք է հասկանալ ծնողների վիշտը, պետք է հասկանալ բոլորիս վիշտը, պետք չէ մեղադրել ծնողներին: Եթե ծնողներին ասում են՝ լրատվամիջոցներին հարցազրույց չտաք, որ ձեր երեխաների համար վատ չլինի, հասկանո՞ւմ եք, եթե ես էլ լինեի ծնողի տեղում, միգուցե ես էլ ընդունեի առ ի գիտություն, որովհետև մյուս կողմում կորած կամ վիրավոր, կամ գերի ընկած երեխաներ կան:

Այստեղ ամբողջ հարցն այն է, որ ծնողներին ստորաբար խաբում են, ինչպես խաբել են 2.5 տարի շարունակ՝ բոլոր բնագավառների հետ կապված:  Այս մարդիկ առանց խաբելու չեն կարող կառավարել, չեն կարող իշխել, այսինքն՝ պետք հասկանալ՝ իրենց ճշմարտությունը շատ հստակ է՝  սո՛ւտ:

Մովսես Հակոբյանն ասեց, չէ՞, 100 տոկոս սուտ է հրամցվել: Մենք տեսել ենք, չէ՞, ինչպես է հրամցվել.  մեզ պարտադրում էին այդ սուտը տիրաժավորել, հրապարակել, բոլոր լրատվամիջոցներին, և եթե լրատվամիջոցը փորձում էր ինչ-որ մի բան ճիշտ ներկայացնել, միանգամից ոստիկանությունն այցելում էր և տուգանք էր գրում:

Ես ձեզ ավելին ասեմ՝  Արծրուն Հովհաննիսյանը, նստած Ստեփանակերտի միասնական կենտրոնում, ստատուս է գրում, որ՝ էս պահին ես գտնվում եմ Հադրութում, այստեղ չգիտես ինչու՝ բոլորը հայեր են: Դա գրում է այն ժամանակ, երբ արդեն լուրը տարածվում է, որ Հադրութն ընկած է»:

Լրատվամիջոցի տնօրենը նշում է, որ վերջինի մասին իրեն հայտնել են այնտեղ գտնվող լրագրողները. «Ասում են՝ այդ ստատուսի պահին Արծրունը նստած էր միասնական կենտրոնում: Այսինքն՝ ամբողջ պատերազմի ընթացքում մենք ականատես ենք եղել սուտ քարոզչության:

Ամենավերջին փաստը՝ Մանե Գևորգյանն ասաց, որ Սոթքում չկան այդ տեսակի բաներ, ես միանգամից գրեցի՝ եթե կառավարության խոսնակը հերքում է, ուրեմն հավատացեք, որ կա, և երկու ժամ հետո պարզվեց, որ, այո՛, Սոթքում ադրբեջանցիներ են:

Եթե պետք է  երկու-երեք ժամ հետո պարզվի, որ ադրբեջանցիները մտել են Սոթք, Մա՛նե Գևորգյան, ինչո՞ւ ես ստում: Ես չեմ հավատում նրանց ասած ոչ մի բառի: Ծնողներն այսօր հավատում են, որովհետև իրենք ստիպված են, պարտավոր են հավատալ, իրենք իրենց համոզում են հավատալ, վաղը չէ մյուս օրը նրանք էլ չեն հավատալու»:

Մանրամասները՝ տեսանյութում