Գերմանիան Ռուսաստանին կոչ է արել Նավալնիի թունավորման հարցով թափանցիկ քննություն իրականացնել
Գերմանիայի կանցլեր Անգելա Մերկելը և ԳԴՀ արտաքին գործերի նախարար Հայկո Մաասը համատեղ հայտարարության մեջ կոչ են արել Ռուսաստանին թափանցիկ քննություն իրականացնել՝ ռուսաստանցի ընդդիմադիր Ալեքսեյ Նավալնիի առողջության վատթարացման հանգամանքները պարզելու համար: Այս մասին հայտնել է «Կոմսոմոլսկայա պրավդա»-ն։
Մերկելը շեշտել է, որ Նավալնիի գործով մեղավորները պետք է հայտնաբերվեն և պատասխանատվության ենթարկվեն:
Օգոստոսի 20-ին 44-ամյա Նավալնիին անգիտակից վիճակում տեղափոխել էին հիվանդանոցի վերակենդանացման բաժանմունք: Ընդդիմադիր գործչի աջակիցները պնդում են, որ նա թունավորվել է, ռուսաստանցի բժիշկները չեն հաստատել այդ վարկածը։ Օգոստոսի 22-ին Ալեքսեյ Նավալնիին տեղափոխել են Գերմանիա, նրա բուժումը շարունակվում է Բեռլինի «Շարիտե» հիվանդանոցում: Բեռլինի «Շարիտե» հիվանդանոցը ռուսաստանցի ընդդիմադիր Ալեքսեյ Նավալնու առողջական վիճակը գնահատում է ծանր, սակայն նշում, որ նրա կյանքին վտանգ չի սպառնում։Նշվում է, որ կլինիկական ուսումնասիրությունները ցույց են տվել, որ գործիչը թունավորվել է խոլինէսթերազ ինհիբիտորների խմբի նյութից։
