«Յուրաքանչյուր մարդ, ով գնահատում է ազգային արժեքները՝ իր առջև պետք է հարց դնի՝ արդյո՞ք ի վիճակի է այդ արժեքները մաքրամաքուր պահպանել, թե՞ այդ արժեքներն օգտագործում է իր նպատակների համար». Սոֆյա Հովսեփյան
ՀՀ վարչապետ Նիկոլ Փաշինյանն այսօր ֆեյսբուքյան ուղիղ եթերում ամփոփելով ապրիլի 24-ի միջոցառումները՝ կարծիք էր հայտնել, որ ապրիլքսանչորսյան միջոցառումներն անթերի չէին, թեև ապրիլի 24-ի երեկոյան միջոցառումը մոտ էր անթերիին:
Ըստ վարչապետի՝ քննարկում են, որ հաջորդ տարի միջոցառման վիրտուալ բաղադրիչը կօգտագործեն:
Նա նաև ընդգծեց՝ երբ հայտարարեցին, որ համավարակի պատճառով փակում են Ծիծեռնակաբերդ տանող ճանապարհը, կոնկրետ շրջանակներից շատ կոնկրետ մեկնաբանություններ եղան, ինչպես և կարելի էր սպասել, որ՝ ահա, այս ապազգային, պրոթուրքական իշխանությունը հատուկ փակում է Ծիծեռնակաբերդը, որպեսզի մոռացության մատնի Ցեղասպանության պատմությունը, և այլն:
«Այդպիսի անհեթեթություններ էին հնչում, բայց մենք ցույց տվեցինք ազգայինի մեր ընկալումը, և, այո, հակադրեցինք այդ ընկալումն այն հին ընկալումներին, որոնք ես անվանում եմ ատկատային ընկալումներ, որովհետև ոմանք նաև չեն խորշել ազգային միջոցառումների տակ որոշակի ատկատներ ապահովել:
Մենք ցույց տվեցինք կոնտրաստն ազգային ինքնության մեր ընկալման: Մենք ցույց տվեցինք իշխանության, մեր կառավարության, հեղափոխության գաղափարախոսության ընկալումը, ազգայինի, հայի տեսակի, հայի կերպարի: Այո, մենք այդ ընկալումը հակադրում ենք մինչ այժմ եղած շատ ընկալումներին: Սա է ապրիլի 24-ի միջոցառումների ամենակարևոր խորհուրդը: Մենք ասում ենք, որ ազգային-ազգային ասելով՝ ազգին թշվառացրել են, ազգին թալանել են են և դա արել են ազգային ամենաբարձր կարգախոսների ներքո: Ես չեմ հավատում այն մարդկանց, որոնք ազգային կարգախոսների ներքո, այդ թվում՝ շահարկելով թեկուզ ընդունելի, ազգին մատուցած իրենց մի շարք ծառայություններ, դա համարել են լեգիտիմություն ազգին նվաստացնելու, ազգին թալանելու, միլիոններ, միլիարդներ վաստակելու, փողեր լվանալու»,- նշեց վարչապետ Փաշինյանը:
168.am-ի հետ զրույցում ԱԺ «Իմ քայլը» խմբակցության պատգամավոր Սոֆյա Հովսեփյանն անդրադառնալով հարցին՝ արդյո՞ք ապրիլքսանչորսյան միջոցառումները պատեհ առիթն էին, որպեսզի վարչապետն անդրադառնար իր ուղիղ եթերի ժամանակ արծարծված թեմաներին, և առհասարակ, ինչպե՞ս կմեկնաբանի վարչապետի այն խոսքը, թե ազգային-ազգային ասելով՝ ավելի քան 25 տարի ազգին թշվառացրել են, ազգին թալանել են և դա արել են ազգային ամենաբարձր կարգախոսների ներքո:
«Հիմա փորձում եք ինձանից գնահատական ակնկալել, որը ես չեմ գնահատելու, որովհետև, եթե վարչապետը խոսել է, ուրեմն՝ նպատակահարմար է գտել այդ մասին խոսելու: Իսկ սկիզբը, հիմքը և շարունակությունը միայն վարչապետը կարող է ասել, թե ինչու է այդպես ասել, ինչու է անդրադարձել կամ ինչ նկատի ուներ: Սա առհասարակ ես չեմ ուզում քննարկել, որովհետև չգիտեմ պատճառները: Ինչ վերաբերում է ազգայինին, կարծում եմ, որ ազգային արժեքների պահպանության արդյունքում՝ մտածողություն ունեցող անձը պետք է լինի առավելագույն բարոյական և, իր խղճի ու մտոք հանդերձ՝ նույն ազգի հանդեպ, որի արժեքները պահպանում է, լինի բարոյական և նվիրական»,- ասաց պատգամավորը:
Ըստ նրա ազգային արժեքների մասին բարձրաձայնող մարդը, որն ասում է, թե ամեն ինչ անում է հանուն ազգի, բայց միևնույն ժամանակ անում է մի բան, որից առավելագույնը տուժում է ազգը, ապա այստեղ խնդիր է առաջանում, թե ո՞րն է տվյալ անձի ազգային արժեքը, ազգային արժեքի անունը տալով ազգին ոչնչացնե՞լը:
«Այս մասին բազմիցս խոսել եմ, և ինձ համար անգամ անընդունելի է, որ այսօրվա այն մարդիկ, որոնց մենք ճանաչում ենք՝ որպես ազգային դաշտից, ազգային գաղափարների շուրջ խոսող մարդիկ, կարող են հայտնվել ինչ-որ մութ պատմությունների մեջ, կաշառքների մեջ, և այլն: Այստեղ հարց է առաջանում, որ այն մարդիկ, որոնք առհասարակ ազգայինը չեն արժևորում և կարևորում, իրենք կարող են հարցնել՝ ո՞րն է ազգայինը, հենց այն, որ թալանո՞ւմ են: Սա շատ վտանգավոր գիծ է, որ յուրաքանչյուր մարդ, ով գնահատում է ազգային արժեքները, ազգային մտածողությունը, իր առջև պետք է հարց դնի՝ արդյո՞ք ի վիճակի է այդ արժեքները մաքրամաքուր պահպանել, թե՞ այդ արժեքներն օգտագործում է իր նպատակների համար: Այսքան անկեղծ պետք է լինի յուրաքանչյուր մարդ, երբ խոսում է ազգայինից, արժեքներից, տեսակից, գենից, այս ամենից խոսելուց նա պետք է իրեն հաշիվ տա, որովհետև ներկայացնում է մեկ ազգի պատկեր, և օտարի համար հարց է առաջանում՝ ո՞րն է ազգայինը, այն, որ թալանո՞ւմ է: Այնպես չէ, որ այս հարցը չի առաջացել, իհարկե առաջացել է, տարիներ շարունակ ոչ միայն՝ իշխանության համար, այլ՝ ՀՀ յուրաքանչյուր քաղաքացու համար: Շատ լավ է, որ այս մասին բարձրաձայնվեց, թերևս, սրան միշտ անդրադարձել ու բարձրաձայնել եմ, նույնիսկ խնդրել եմ, որ, եթե չեն կարողանում այդ արժեքը պահել, ապա թող անկեղծ ու ազնիվ լինեն, քանի որ նման կերպ ոտնահարում են նաև այն մարդկանց արժեքը, որոնք իրապես նվիրյալներ են»,- հավելեց նա:
Հարցին՝ հեղափոխությունից արդեն երկու տարի է անցել, կա՞ դատարանով հաստատված թալանի մեկ դեպք, որի մասին վարչապետը հաճախ է խոսում, և արդյո՞ք նման հարցեր բարձրաձայնում են «Քաղաքացիական պայմանագիր» կուսակցության նիստերի ժամանակ, պատգամավորը պատասխանեց, որ արդեն մեկ ամիս է՝ ինչ դարձել է ՔՊ-ի անդամ և կուսակցության նիստերին չի մասնակցել, ուստի չի կարող ասել՝ այդ հարցերը վարչապետի հետ քննարկո՞ւմ են, թե՞ ոչ, գնահատականներ եղե՞լ են, թե՞ ոչ.
«Իսկ թալանի հետ կապված, կարծում եմ՝ գործընթացները սկսված են, նաև «Ապօրինի գույքի բռնագանձման մասին» օրենքի կիրառումը կբացի ամբողջ պատկերը: Բացի այդ, եթե ես այսօր որպես քաղաքական գործիչ կարող եմ խոսել, ապա մեկ տարի առաջ ինքս քաղաքական գործիչ չէի, և այդ ամենն իմ աչքի առաջ էր կատարվում, և իրականությունից մենք փախչել չենք կարող: Լինելով ԱԺ պատգամավոր՝ կարող եմ հարց տալ՝ ինչպե՞ս էր հնարավոր ստանալ այդքան աշխատավարձ և Մոնումենտում խորհրդարանի շենքի չափերով և ձևով ունենալ տուն, սա ուղղակի անհնարին բան է»,- շեշտեց Սոֆյա Հովսեփյանը:
Հաջորդ հարցին՝ թալան կատարած մարդիկ ինչո՞ւ այս երկու տարիների ընթացքում չեն դատապարտվել, սա հարց է, որը հետաքրքրում է շատերին, պատգամավորը պատասխանեց, որ այդ հարցն իրեն էլ է շատ հետաքրքիր, միևնույն ժամանակ՝ գիտակցում է, որ բավականին լուրջ օրենսդրական փոփոխությունների կարիք կա:
«Այսինքն՝ այստեղ միայն խոսելով չէ, միևնույն ժամանակ կան և՛ հետախուզություններ, և՛ հարուցված գործեր, այնպես չէ, որ ոչինչ արված չէ յուրացումների մասով»,- եզրափակեց Սոֆյա Հովսեփյանը:
