ՀՀ ՍԱՏՄ ղեկավար Գեորգի Ավետիսյանը շնորհավորել է անասնաբույժներին մասնագիտական տոնի առթիվ
ՀՀ սննդամթերքի անվտանգության պետական ծառայության ղեկավար Գեորգի Ավետիսյանը տեսաուղերձով շնորհավորում է բոլոր անասնաբույժներին մասնագիտական տոնի կապակցությամբ: Նա անասնաբույժներին մաղթում է միշտ պահանջված լինել, գնահատված և ապրել արժանապատիվ կյանքով:
«Սիրելի անասնաբույժներ, 2000 թվականից սկսած՝ ապրիլի վերջին շաբաթը համարվում է Անասնաբույժի միջազգային օր: Այդ օրը հռչակվել է Անասնաբուժության համաշխարհային ասոցիացիայի կողմից, որի նպատակը եղել է ցույց տալ, թե ինչպիսին է անասնաբույժի գործը, ինչ կարևորություն ունի այն, և ինչ ենք անում մենք սննդամթերքի անվտանգության ոլորտում, որը վերաբերում է կենդանական ծագման մթերքներին»,-շում է Ավետիսյանը:
Նա հիշեցնում է, որ 2019 թվականին առաջին անգամ պետական մակարդակով են նշել Անասնաբույժի օրը: Միջոցառումներ էին նախատեսված նաև այս տարի, սակայն հայտնի պատճառներով դրանք հետաձգվել են:
Ավետիսյանի հավաստիացմամբ՝ անասնաբուժությունը ոչ միայն պայքար է կենդանիների հիվանդությունների, այլև մարդկանց հիվանդությունների դեմ: «Անասնաբույժների վատ աշխատանքը բժիշկների համար գլխացավանք կստեղծի»,-նշում է ՍԱՏՄ ղեկավարն ու հավելում, որ մեր երկրում անասնաբույժներն ըստ արժանվույն գնահատված չեն եղել, սակայն իրենք ջանք չեն խնայում դա շտկելու համար:
Անդրադառնալով կորոնավիրուսի տարածմանը՝ Ավետիսյանը շեշտեց, որ կենդանական ծագման մթերքից հնարավոր չէ վարակվել կորոնավիրուսով:
