«Հիմա ունենք, իհարկե, լարված և վատթար վիճակ՝ տրանսպորտի հետ կապված, բայց կոլապսից հեռու ենք». Երևանի քաղաքապետի մամուլի խոսնակ
Հայաստանում կորոնավիրուսի տարածման կանխարգելմամբ և երկրում արտակարգ դրության հաստատմամբ պայմանավորված՝ այս օրերին պակասել է ինչպես՝ հանրային տրանսպորտային միջոցներից օգտվողների քանակը, այնպես էլ՝ տրանսպորտային միջողների շարժակազմը:
Երևանի փոխքաղաքապետ Սերգեյ Հարությունյանը վստահեցնում է, որ Երևանում գրանցված և գործող բոլոր տեսակի տրանսպորտային միջոցները, լինեն դրանք քաղաքապետարանի տիրույթում գործող թե մասնավոր, ամեն օր ախտահանվում են:
«Կա կնքված պայմանագիր Հիվանդությունների վերահսկման և կանխարգելման ազգային կենտրոնի ցուցումով տրված մի ՓԲԸ-ի հետ, որը պրոֆեսիոնալ մակարդակի և բոլոր միջազգային նորմերին համապատասխան կատարում է ախտահանիչ աշխատանքներ, լինի մետրոն, լինի ավտոբուսը, գազել մեքենաները, միկրոավտոբուսները: Բոլորը վնասազերծվում են ամեն օր, և այդ աշխատանքը կտևի այնքան, ինչքան կլինի կարիքը դա իրականացնելու»,- ասաց Սերգեյ Հարությունյանը:
Փոխքաղաքապետի ներկայացրած թվային տվյալների համաձայն՝ եթե մինչև այս, սովորական պայմաններում Երևանի մետրոպոլիտենում օրական ուղևորափոխադրումը շուրջ 75.000 էր, ապա այս օրերին 5 անգամ պակաս է՝ շուրջ 15.000: Գրեթե նմանատիպ իրավիճակ կա ավտոբուսների դեպքում: Ավտոբուսներից նախկինում օրական 70.000 ուղևոր էր օգտվում, հիմա՝ 20.000: Ինչ վերաբերում է միկրոավտոբուսներին, ապա այսօր երթուղի է դուրս գալիս 500 միկրոավտոբուս՝ նախկին 850-900-ի փոխարեն:
Սերգեյ Հարությունյանի փոխանցմամբ՝ այս օրերին չեն աշխատում նաև տրանսպորտային միջոցների այն վարորդները, որոնց տարիքը 60-ն անց է կամ ունեն խրոնիկ հիվանդություններ՝ շաքարային դիաբետ կամ սրտանոթային որևէ խրոնիկ հիվանդություն:
«Չկա մի թաղամաս, որը զրկվել է տրանսպորտից: Ամեն տեղ էլ կա տրանսպորտ, պարզապես քանակը սակավել է: Այո, որոշակի դժվարություններ է առաջացնում, բայց հաշվի առնելով ներկայիս իրավիճակը՝ հայցում եմ ներողամտությունը մեր քաղաքացիներից, որ այս վիճակն ա»,- ասաց Սերգեյ Հարությունյանը:
Այս օրերին շատ վարորդներ բարձրաձայնում են տրանսպորտային միջոցներից օգտվող քաղաքացիների պակաս թվի և դրա արդյունքում իրենց աշխատանքի «անարդյունք» լինելու մասին: Անգամ խոսվում է մասնավոր տրանսպորտային ընկերությունների՝ որոշ ժամանակով աշխատանքը դադարեցնելու հնարավոր որոշման մասին: Շատերի կարծիքով՝ մասնավոր տրանսպորտային միջոցների «գիծ դուրս չգալը» կարող է կոլապսային վիճակի պատճառ դառնալ:
«Եթե ինչ-որ նման իրավիճակի հասնենք, Երևանի քաղաքային՝ համայնքի ենթակայության տակ գտնվող «Երևանի ավտոբուս» ՓԲԸ-ն ունի ռեզերվային թվով ավտոբուսներ: Այդ ավտոբուսները պահվում են կոլապսային իրավիճակներում օգտագործելու համար, այսինքն՝ կոլապսային իրավիճակներից խուսափելու համար՝ ծայրահեղ իրավիճակներում: Մենք կարող ենք համարել, որ հիմա ունենք, իհարկե, լարված և վատթար վիճակ՝ տրանսպորտի հետ կապված, բայց կոլապսից հեռու ենք»,- ասաց Երևանի քաղաքապետի մամուլի խոսնակ Հակոբ Կարապետյանը:
Անդրադառնալով վարորդների օրական վճարվող տուրքին՝ քաղաքապետի մամուլի խոսնակն ասաց.
«Տեղյակ եմ, որ մասնավոր ուղևորափոխադրող ընկերությունները, մի շարք ընկերություններ որոշակի փոփոխություններ են կատարել վարորդներից ստացվող, այսպես ասած, «պլանի» հարցում, և նվազեցրել են այդ տուրքերը: Եվ նաև տեղյակ եմ, որ քաղաքապետարանը և կառավարական մարմինները քննարկումներ են անցկացնում՝ որոշակի այլ տուրքերի վերանայման հետ կապված»:
Քաղաքապետարանի ներկայացուցիչները վստահեցնում են՝ ամեն առավոտ աշխատանքը սկսելուց առաջ տրանսպորտային միջոցների վարորդները ջերմաչափման են ենթարկվում: Այդուհանդերձ, քաղաքացիներին հորդորում են չօգտվել այն տրանսպորտային միջոցից, որում արդեն զբաղված են բոլոր նստարանները, կամ որում շատ քաղաքացիներ կան, ինչպես նաև՝ տրանսպորտային միջոցից օգտվելիս կրել դիմակներ:
