«Վարդանյան ընտանիքի» նվերը՝ Պաշտպանության նախարարությանը
«Վարդանյան ընտանիք» բարեգործական հիմնադրամը 48 միլիոն 671 հազար դրամ ընդհանուր արժեքով գույք է նվիրել Պաշտպանության նախարարությանը։
Նվիրատվության մասին որոշումը գործադիրն ընդունել է Կառավարության մարտի 5-ի նիստում. նախագիծն ընդգրկված էր չզեկուցվող հարցերի շարքում։
Նվիրատվություն անելու համար ՀՀ պաշտպանության նախարարությանն է դիմել «Վարդանյաններ ընտանիք» բարեգործական հիմնադրամի ղեկավարությունը՝ տեղեկացնելով, որ բարեգործական հիմնադրամը ցանկություն է հայտնում նախարարությանը նվիրել 48,671.3 հազար դրամ ընդհանուր արժողությամբ 22 անվանում սարքավորում։
Նշված սարքավորումները ՀՀ պաշտպանության նախարարությանը նվիրաբերվելուց հետո, ըստ նախագծի, դրանք պետք է օգտագործվեն նպատակային նշանակությամբ և ամրակցվեն Պաշտպանության նախարարության կենտրոնական կլինիկական զինվորական հոսպիտալին։
Նկատենք, որ նախագծի վերաբերյալ Ֆինանսների նախարարությունից հայտնել են, որ այս նվիրատվության վերաբերյալ առարկություն չեն ներկայացնի այն դեպքում, եթե որպես նվիրատվություն ընդունվող բժշկական սարքավորումների պահպանման և շահագործման ծախսերն իրականացվեն ՀՀ 2020 թվականի պետական բյուջեով Պաշտպանության նախարարությանը հատկացված ընդհանուր միջոցների հաշվին։
Այսպիսով՝ Պաշտպանության նախարարությունը տվել է համաձայնություն շահագործման ծախսերն իր միջոցների հաշվին իրականացնելու համար և տեր դարձել նվիրատվությանը։
